രണ്ടായിരം വർഷം മുൻപ് എഴുതപ്പെട്ട ഒരു കോർപ്പറേറ്റ്

19 October 2026

രണ്ടായിരം വർഷം മുൻപ് എഴുതപ്പെട്ട ഒരു കോർപ്പറേറ്റ് - ലൈഫ് മാനുവൽ!

സ്കൂൾ കാലത്ത് പരീക്ഷയ്ക്ക് വേണ്ടി നമ്മൾ കാണാപാഠം പഠിച്ച ചില തമിഴ് വരികളല്ല യഥാർത്ഥ 'തിരുക്കുറൾ'. ഇന്നത്തെ കാലത്ത് നമ്മൾ ആയിരങ്ങൾ കൊടുത്തു അറ്റൻഡ് ചെയ്യുന്ന മോട്ടിവേഷണൽ ക്ലാസുകളിലെയും, മാനേജ്‌മെന്റ് സെമിനാറുകളിലെയും ഏറ്റവും മികച്ച ആശയങ്ങൾ നൂറ്റാണ്ടുകൾക്ക് മുൻപേ തിരുവള്ളുവർ ഇതിൽ പറഞ്ഞുവെച്ചിട്ടുണ്ട്!

മാറുന്ന കാലത്തെ പ്രതിസന്ധികളെ അതിജീവിക്കാൻ തിരുക്കുറളിലെ 20 സുവർണ്ണ പാഠങ്ങളെ ഇന്നത്തെ ന്യൂജെൻ സാഹചര്യങ്ങളുമായി ബന്ധിപ്പിച്ച് തയ്യാറാക്കിയ പുതിയ പുസ്തകം:

📘 പുസ്തകത്തിന്റെ പേര്: തിരുക്കുറൾ @ ന്യൂജെൻ (രണ്ടായിരം വർഷം പഴക്കമുള്ള കോർപ്പറേറ്റ് - ലൈഫ് മാനുവൽ

ഈ പുസ്തകത്തിൽ നിങ്ങൾക്കെന്തൊക്കെ ലഭിക്കും?

✅ വിദ്യാർത്ഥികൾക്കും യുവതയ്ക്കും: ആർട്ടിഫിഷ്യൽ ഇന്റലിജൻസ് കാലത്തെ സ്കിൽ ഡെവലപ്മെന്റ്, പുതിയ ലക്ഷ്യങ്ങൾ വെക്കാനുള്ള ധൈര്യം.

✅ പ്രൊഫഷണലുകൾക്ക്: എച്ച്.ആർ മാനേജ്മെന്റ്, ടൈം മാനേജ്മെന്റ്, കോർപ്പറേറ്റ് സ്ട്രാറ്റജി, ഡിസിഷൻ മേക്കിംഗ്.

✅ രക്ഷിതാക്കൾക്ക്: ടോക്സിക് പാരന്റിംഗ് ഒഴിവാക്കി, കുട്ടികളുടെ യഥാർത്ഥ 'അൾട്ടിമേറ്റ് മെന്റർ' ആകാനുള്ള വഴികൾ.

✅ സാധാരണക്കാർക്ക്: സ്ട്രെസ്സ് മാനേജ്മെന്റ്, ഇമോഷണൽ ഇന്റലിജൻസ്, ഫിനാൻഷ്യൽ പ്ലാനിംഗ്.

പഴയ സിലബസുകളും പഴയ കരിയറുകളും ഇല്ലാതാകുന്ന ഈ കാലത്ത്, നിങ്ങളുടെ ജീവിതത്തെയും ചിന്തകളെയും റീ-പ്രോഗ്രാം ചെയ്യാൻ ഈ പുസ്തകം ഒരു ടൂൾകിറ്റായി മാറും തീർച്ച.

‘തിരുക്കുറൾ @ ന്യൂജെൻ'.pdf

Article By: Mujeebulla K.M
CIGI Career Team

Comments (0)

Write a Comment

Nizar Peruvad
2026-10-19

ആരോഗ്യ അനുബന്ധ പ്രഫഷനലുകൾക്ക് ഇനി നിയമത്തിന്റെ പൂർണ്ണ പിൻബലം- NCAHP രജിസ്ട്രേഷൻ ചട്ടങ്ങൾ എത്തി; അറിയേണ്ടതെല്ലാം

ആരോഗ്യരംഗത്ത് ഡോക്ടർമാർക്കും ദന്തഡോക്ടർമാർക്കും നഴ്സുമാർക്കും ഫാർമസിസ്റ്റുകൾക്കുമെല്ലാം അവരുടെ പഠനവും പരിശീലനവും രജിസ്ട്രേഷനും തൊഴിൽപരമായ പ്രവർത്തനവുമൊക്കെ നിയന്ത്രിക്കാൻ കൃത്യമായ നിയമസംവിധാനങ്ങളുണ്ട്.

ആധുനിക വൈദ്യശാസ്ത്ര ഡോക്ടർമാരുടെ വിദ്യാഭ്യാസം മുതൽ പ്രാക്ടീസും രജിസ്ട്രേഷനും വരെ നിയന്ത്രിക്കുന്നത് നാഷണൽ മെഡിക്കൽ കമ്മീഷനാണ് (NMC). ദന്തചികിത്സാരംഗത്ത് നാഷണൽ ഡെന്റൽ കമ്മീഷനും (NDC), നഴ്സിങ്ങിന് ഇന്ത്യൻ നഴ്സിങ് കൗൺസിലും (INC), ഫാർമസിക്ക് ഫാർമസി കൗൺസിൽ ഓഫ് ഇന്ത്യയും (PCI) മേൽനോട്ടം വഹിക്കുന്നു.

എന്നാൽ, ആരോഗ്യരംഗത്ത് ഇവർക്കൊപ്പം തോളോടുതോൾ ചേർന്ന് പ്രവർത്തിക്കുന്ന മറ്റൊരു വലിയ വിഭാഗത്തിന് ഇത്തരമൊരു ഏകീകൃത നിയമസംവിധാനം ദീർഘകാലമായി ഉണ്ടായിരുന്നില്ല.

ഫിസിയോതെറാപ്പിസ്റ്റുകൾ, ഒക്യുപേഷണൽ തെറാപ്പിസ്റ്റുകൾ, മെഡിക്കൽ ലബോറട്ടറി വിദഗ്ധർ, റേഡിയോളജി-ഇമേജിങ് സാങ്കേതികവിദഗ്ധർ, ഒപ്റ്റോമെട്രിസ്റ്റുകൾ, ഡയാലിസിസ് ടെക്നോളജിസ്റ്റുകൾ, റെസ്പിറേറ്ററി തെറാപ്പിസ്റ്റുകൾ, പോഷകാഹാര വിദഗ്ധർ തുടങ്ങി ആരോഗ്യസംവിധാനത്തിന്റെ അവിഭാജ്യഘടകമായ ഒട്ടേറെപ്പേർ ഈ നിരയിലുണ്ട്.

ഇവരുടെ സേവനം ജീവൻരക്ഷാരംഗത്ത് അത്യന്താപേക്ഷിതമായിരുന്നിട്ടും, ആരാണ് യഥാർത്ഥ പ്രഫഷനൽ, ഏത് യോഗ്യതയ്ക്കാണ് അംഗീകാരമുള്ളത്, രജിസ്ട്രേഷൻ എങ്ങനെ നേടണം, തൊഴിൽനിലവാരം എങ്ങനെ നിലനിർത്തണം തുടങ്ങിയ കാര്യങ്ങളിലൊന്നും എല്ലാവർക്കും ബാധകമായ ഒരു ദേശീയ നിയമം ഉണ്ടായിരുന്നില്ല.

ഈ വിടവ് നികത്താനാണ് നാഷണൽ കമ്മീഷൻ ഫോർ അലൈഡ് ആൻഡ് ഹെൽത്ത്‌കെയർ പ്രൊഫഷൻസ് (NCAHP) എന്ന ദേശീയ നിയന്ത്രണ സംവിധാനം കേന്ദ്രസർക്കാർ കൊണ്ടുവന്നത്.

2020-ൽ പാർലമെന്റിൽ അവതരിപ്പിച്ച ബിൽ, 2021 മാർച്ചിൽ ഇരുസഭകളും പാസാക്കി. തുടർന്ന് 2021 മേയ് 25-ന് NCAHP നിയമം പ്രാബല്യത്തിൽ വന്നു.

എന്നാൽ നിയമം നിലവിൽ വന്നതുകൊണ്ടുമാത്രം ഈ വിപുലമായ സംവിധാനം ഒറ്റദിവസം കൊണ്ട് പ്രവർത്തനക്ഷമമാകില്ലായിരുന്നു. വിവിധ തൊഴിൽമേഖലകളുടെ മാനദണ്ഡങ്ങൾ, സിലബസ് ചട്ടക്കൂടുകൾ, സംസ്ഥാന കൗൺസിലുകൾ, രജിസ്ട്രেশন പോർട്ടലുകൾ എന്നിവയെല്ലാം ഘട്ടംഘട്ടമായി രൂപപ്പെടേണ്ടതുണ്ടായിരുന്നു.

ഇപ്പോൾ ആ കാത്തിരിപ്പിന് വിരാമമിട്ട് നിർണായകമായ ഒരു നാഴികക്കല്ല് കൂടി പിന്നിട്ടിരിക്കുകയാണ്.

2026 ഓഗസ്റ്റ് 31-ന് NCAHP രജിസ്ട്രേഷൻ സംബന്ധിച്ച സമഗ്രമായ ചട്ടങ്ങൾ ഔദ്യോഗികമായി വിജ്ഞാപനം ചെയ്തു.

ഇതോടെ, കമ്മീഷന്റെ പരിധിയിൽ വരുന്ന ആരോഗ്യ അനുബന്ധ പ്രഫഷനലുകൾക്ക് നിയമപരമായ അംഗീകാരത്തിലേക്കുള്ള വാതിൽ തുറന്നിരിക്കുന്നു.

ഇത് ഒരു രജിസ്ട്രേഷൻ നമ്പർ ലഭിക്കുന്നതിൽ മാത്രം ഒതുങ്ങുന്ന കാര്യമല്ല:

ഏത് യോഗ്യതയ്ക്കാണ് അംഗീകാരമുള്ളതെന്ന് വ്യക്തമാകും.
പ്രഫഷനലുകളുടെ ഔദ്യോഗിക ദേശീയ-സംസ്ഥാന രജിസ്റ്ററുകൾ നിലവിൽ വരും.
തൊഴിൽമേഖലയിൽ കൃത്യമായ പ്രഫഷണൽ വ്യക്തിത്വവും വ്യതിരിക്തതയും ഉറപ്പാകും.
പരിശീലനത്തിനും ക്ലിനിക്കൽ പ്രാക്ടീസിനും കർശന നിലവാരമുണ്ടാകും.
തുടർപഠനത്തിനും തൊഴിൽപരമായ വളർച്ചയ്ക്കും വലിയ പ്രാധാന്യം ലഭിക്കും.

ചുരുക്കത്തിൽ, കൃത്യമായ നിയമപരിരക്ഷയോ മേൽനോട്ടമോ ഇല്ലാതെ പ്രവർത്തിച്ചിരുന്ന വലിയൊരു വിഭാഗത്തിന് ഇനി ശക്തമായൊരു നിയമാധിഷ്ഠിത ചട്ടക്കൂട് ലഭ്യമാകുകയാണ്.

പുതിയ ചട്ടങ്ങൾ വിജ്ഞാപനം ചെയ്യപ്പെട്ടതോടെ വിദ്യാർത്ഥികൾക്കും നിലവിൽ ജോലി ചെയ്യുന്നവർക്കും മുന്നിൽ ഉയരുന്ന പ്രധാന സംശയങ്ങളും അവയ്ക്കുള്ള വ്യക്തതകളും നമുക്ക് പരിശോധിക്കാം.

ആരൊക്കെയാണ് രജിസ്റ്റർ ചെയ്യേണ്ടത്?:

ആദ്യം മനസ്സിലാക്കേണ്ട ഒരു അടിസ്ഥാന കാര്യമുണ്ട്: ഒരു കോഴ്സിന്റെ പേരിനൊപ്പം “Allied Health” എന്നോ “Healthcare” എന്നോ കണ്ടതുകൊണ്ടുമാത്രം ആ പഠനം പൂർത്തിയാക്കിയ എല്ലാവർക്കും രജിസ്ട്രേഷൻ ലഭിക്കില്ല.

NCAHP-ന്റെ പരിധിയിൽ വരുന്ന അംഗീകൃത മേഖലകളിൽ നിയമപരമായി പ്രാക്ടീസ് ചെയ്യാനാണ് രജിസ്ട്രേഷൻ നിർബന്ധമാക്കിയിട്ടുള്ളത്. അതിനാൽ രജിസ്ട്രേഷൻ യോഗ്യത പരിശോധിക്കുമ്പോൾ നാല് കാര്യങ്ങൾ പ്രധാനമായും ഉറപ്പുവരുത്തണം:

അംഗീകൃത പ്രഫഷൻ (Recognised Profession): നിങ്ങൾ ചെയ്യുന്ന തൊഴിൽ നിയമത്തിൽ നിർവചിച്ച വിഭാഗത്തിൽ പെട്ടതാണോ?
അംഗീകൃത യോഗ്യത (Recognised Qualification): പഠിച്ച കോഴ്സും സിലബസും കമ്മീഷൻ അംഗീകരിച്ചിട്ടുണ്ടോ?
അംഗീകൃത സ്ഥാപനം (Recognised Institution): പഠിച്ച കോളേജിനോ സർവകലാശാലയ്ക്കോ ആവശ്യമായ നിയമാനുസൃത അഫിലിയേഷൻ ഉണ്ടോ?
ആവശ്യപ്പെടുന്ന പ്രവൃത്തിപരിചയം (Prescribed Experience): നിർദിഷ്ട പ്രഫഷന് പ്രവൃത്തിപരിചയം നിഷ്കർഷിച്ചിട്ടുണ്ടെങ്കിൽ അത് നേടിയിട്ടുണ്ടോ?

പത്ത് പ്രധാന മേഖലകൾ:

NCAHP നിയമം വിവിധ അനുബന്ധ ആരോഗ്യ തൊഴിലുകളെ പത്ത് പ്രധാന മേഖലകളായാണ് തിരിച്ചിരിക്കുന്നത്. ഓരോ മേഖലയിലെയും കോഴ്സുകൾക്കും ക്ലിനിക്കൽ പരിശീലനത്തിനും, ചിലയിടങ്ങളിൽ പ്രവൃത്തിപരിചയത്തിനും ചട്ടങ്ങൾ പ്രത്യേക നിബന്ധനകൾ വെച്ചിട്ടുണ്ട്.

അതിനാൽ പൊതുവായ പേരുകൾക്ക് പിന്നാലെ പോകാതെ സ്വന്തം തൊഴിലിനും യോഗ്യതയ്ക്കും ബാധകമായ നിർദേശങ്ങളാണ് പരിശോധിക്കേണ്ടത്.

ബിരുദം മാത്രം മതിയോ, പ്രവൃത്തിപരിചയം വേണമോ?

പലർക്കും സംശയമുണ്ടാകുന്ന ഭാഗമാണിത്.

NCAHP രജിസ്ട്രേഷന് യോഗ്യതയ്ക്കൊപ്പം പ്രവൃത്തിപരിചയം വേണമോ എന്നത് ഓരോ തൊഴിലിനെയും പഠനവഴിയെയും ആശ്രയിച്ചിരിക്കും.

ഫിസിയോതെറാപ്പി, ഒക്യുപേഷണൽ തെറാപ്പി, മെഡിക്കൽ ലാബ് സയൻസ്, റേഡിയോളജി-ഇമേജിങ്, ഒപ്റ്റോമെട്രി തുടങ്ങിയ പല മേഖലകളിലും നിശ്ചിത അംഗീകൃത ബിരുദവും നിർബന്ധിത ഇന്റേൺഷിപ്പും പൂർത്തിയാക്കിയാൽ മതിയാകും; അധിക പ്രവൃത്തിപരിചയം നിർബന്ധമില്ല.

എന്നാൽ സൈക്കോളജി, സോഷ്യൽ വർക്ക് തുടങ്ങിയ ചില മേഖലകളിൽ ബിരുദം കൊണ്ടുമാത്രം കാര്യമില്ല; നിർദിഷ്ട ആരോഗ്യമേഖലയിലുള്ള (Health-setting) പ്രവൃത്തിപരിചയം കൂടി ചട്ടങ്ങൾ ആവശ്യപ്പെടുന്നുണ്ട്.

അതുകൊണ്ട് “രജിസ്ട്രേഷന് പ്രവൃത്തിപരിചയം വേണം” എന്നോ “പ്രവൃത്തിപരിചയം തീരെ വേണ്ട” എന്നോ സാമാന്യവൽക്കരിക്കുന്നത് തെറ്റാണ്.

സൈക്കോളജി വിഭാഗത്തിന് ഇത്രയും ആവേശം എന്തുകൊണ്ട്?:

പുതിയ ചട്ടങ്ങൾ വന്നതോടെ സൈക്കോളജി രംഗത്ത് വലിയ ചർച്ചകളാണ് നടക്കുന്നത്. കാരണം, NCAHP-യുടെ ബിഹേവിയറൽ ഹെൽത്ത് സയൻസസ് വിഭാഗത്തിൽ ‘സൈക്കോളജിസ്റ്റ്’ എന്ന പദവി ഉൾപ്പെടുത്തിയിട്ടുണ്ട്. ഇതോടെ സൈക്കോളജി പഠിച്ച വലിയൊരു വിഭാഗത്തിന് ആദ്യമായി ദേശീയതലത്തിൽ ഒരു നിയമാനുസൃത രജിസ്ട്രേഷൻ സംവിധാനത്തിന്റെ ഭാഗമാകാൻ വഴിയൊരുങ്ങുകയാണ്. നേരത്തെ നിശ്ചിത യോഗ്യതയുള്ള ക്ലിനിക്കൽ സൈക്കോളജിസ്റ്റുകൾക്ക് റിഹാബിലിറ്റേഷൻ കൗൺസിൽ ഓഫ് ഇന്ത്യ (RCI) നൽകുന്ന രജിസ്ട്രേഷൻ മാത്രമാണ് ഉണ്ടായിരുന്നത്. ഇപ്പൊൾ മറ്റു സൈക്കോളജിസ്റ്റുകൾക്ക് NCAHP യില് രജിസ്റ്റർ ചെയ്യുവാൻ അവസരം വന്നിരിക്കുകയാണ്.

എന്നാൽ ഇവിടെയും ഒരു കാര്യം ഓർക്കണം: സൈക്കോളജിയിൽ ഏതെങ്കിലും ഒരു ബിരുദമുള്ള എല്ലാവർക്കും നേരിട്ട് രജിസ്ട്രേഷൻ ലഭിക്കില്ല. വിവിധ പഠനരീതികൾക്ക് ചട്ടങ്ങൾ കൃത്യമായ മാനദണ്ഡങ്ങൾ വെച്ചിട്ടുണ്ട്. ചില പ്രത്യേക വിഭാഗങ്ങളിൽ നിശ്ചിത ആശുപത്രി-ക്ലിനിക്കൽ പ്രവൃത്തിപരിചയം കൂടിയുണ്ടെങ്കിലേ രജിസ്ട്രേഷൻ സാധ്യമാകൂ.

പ്രവൃത്തിപരിചയം എവിടെ നിന്നുള്ളതായിരിക്കണം?:

നിലവിൽ ഏറ്റവും കൂടുതൽ വ്യക്തത ആവശ്യപ്പെടുന്ന ഭാഗമാണിത്. ചട്ടങ്ങളിലെ ആദ്യ പട്ടികയിൽ (Schedule I), സൈക്കോളജിയിലെ ചില വിഭാഗങ്ങൾക്ക് അംഗീകൃത ആരോഗ്യകേന്ദ്രങ്ങളിലെ പ്രവൃത്തിപരിചയം നിഷ്കർഷിച്ചിട്ടുണ്ട്.

എന്നാൽ ഏതൊക്കെ ആശുപത്രികളോ സ്ഥാപനങ്ങളോ ആണ് ഈ പരിധിയിൽ വരിക, ആര് നൽകുന്ന സർട്ടിഫിക്കറ്റാണ് സ്വീകരിക്കുക എന്ന കാര്യങ്ങളിൽ ഇനിയും പൂർണമായ പ്രവർത്തന മാർഗരേഖകൾ വരേണ്ടതുണ്ട്. അതിനാൽ ക്ലിനിക്കുകളിലോ കൗൺസിലിങ് സെന്ററുകളിലോ എൻ.ജി.ഒകളിലോ ജോലി ചെയ്തു എന്നതുകൊണ്ടുമാത്രം ആ സർട്ടിഫിക്കറ്റുകൾ കണ്ണടച്ച് സ്വീകരിക്കപ്പെടും എന്ന് കരുതരുത്.

ഇതിനകം ജോലി ചെയ്യുന്നവർ സ്ഥാപനത്തിന്റെ പേര്, ഔദ്യോഗിക പദവി, ജോലി ചെയ്ത കാലയളവ്, പ്രവർത്തിച്ച വിഭാഗം, ഉത്തരവാദിത്തങ്ങൾ എന്നിവ വ്യക്തമായി കാണിക്കുന്ന ഔദ്യോഗിക സാക്ഷ്യപത്രങ്ങൾ കരുതിവെക്കുന്നത് നന്നായിരിക്കും.

NCAHP-യും RCI-യും: ആരുടെ കീഴിൽ ആര്?:

ഏറ്റവും കൂടുതൽ ആശയക്കുഴപ്പമുണ്ടാകാൻ സാധ്യതയുള്ള മേഖലയാണിത്. NCAHP-യും റിഹാബിലിറ്റേഷൻ കൗൺസിൽ ഓഫ് ഇന്ത്യയും (RCI) പൂർണമായും വ്യത്യസ്തമായ രണ്ട് നിയമപരമായ സംവിധാനങ്ങളാണ്.

പുനരധിവാസ (Rehabilitation) മേഖലയിലെ വിദഗ്ധരെ നിയന്ത്രിക്കുന്നത് 1992-ലെ RCI നിയമപ്രകാരമാണ്. ഇവർ പ്രാക്ടീസ് ചെയ്യേണ്ടത്.

ആർ.സി.ഐയുടെ സെൻട്രൽ റിഹാബിലിറ്റേഷൻ രജിസ്റ്ററിലാണ് (CRR).

RCI പരിധിയിൽ വരുന്നവർ ആരൊക്കെ: ക്ലിനിക്കൽ സൈക്കോളജിസ്റ്റുകൾ, ക്ലിനിക്കൽ/റിഹാബിലിറ്റേഷൻ സൈക്കോളജിസ്റ്റുകൾ, ഓഡിയോളജിസ്റ്റുകൾ, സ്പീച്ച്-ലാംഗ്വേജ് പതോളജിസ്റ്റുകൾ, പ്രോസ്തെറ്റിസ്റ്റ്-ഓർത്തോട്ടിസ്റ്റുകൾ, സ്പെഷ്യൽ എഡ്യൂക്കേറ്റർമാർ, റിഹാബിലിറ്റേഷൻ സോഷ്യൽ വർക്കർമാർ എന്നിവർ.
NCAHP പരിധിയിൽ വരുന്നവർ:
ജനറൽ/ബിഹേവിയറൽ സൈക്കോളജിസ്റ്റുകൾ, മെഡിക്കൽ സോഷ്യൽ വർക്കർമാർ, സൈക്യാട്രിക് സോഷ്യൽ വർക്കർമാർ രജിസ്ട്രേഷൻ നിയമത്തിൻ്റെ ഷെഡ്യൂളിൽ പരാമർശിച്ച മറ്റുള്ള പ്രൊഫഷണലുകൾ.

ചുരുക്കത്തിൽ, ക്ലിനിക്കൽ സൈക്കോളജിസ്റ്റുകൾക്കോ സ്പീച്ച് തെറാപ്പിസ്റ്റുകൾക്കോ NCAHP രജിസ്ട്രേഷനല്ല ബാധകം; മറിച്ച് ആർ.സി.ഐ നൽകുന്ന സി.ആർ.ആർ (CRR) രജിസ്ട്രേഷനാണ് അനിവാര്യം. പേരിൽ ‘സൈക്കോളജി’ എന്ന സാമ്യമുണ്ടെങ്കിലും ഇവ രണ്ടും രണ്ട് നിയമവഴികളാണ്.

മെഡിക്കൽ-സൈക്യാട്രിക് സോഷ്യൽ വർക്കർമാർ ശ്രദ്ധിക്കാൻ:

സോഷ്യൽ വർക്ക് പഠിച്ചവർക്കും പുതിയ ചട്ടങ്ങൾ വ്യക്തമായ ദിശാബോധം നൽകുന്നുണ്ട്. പട്ടികയിൽ മെഡിക്കൽ സോഷ്യൽ വർക്കർ, സൈക്യാട്രിക് സോഷ്യൽ വർക്കർ, ക്ലിനിക്കൽ സോഷ്യൽ വർക്കർ എന്നീ വിഭാഗങ്ങൾ ഉൾപ്പെടുന്നു. ആശുപത്രികളിൽ രോഗികളുടെയും കുടുംബങ്ങളുടെയും മാനസിക-സാമൂഹിക പ്രശ്നങ്ങൾ കൈകാര്യം ചെയ്യുന്നതിലും പുനരധിവാസ ആസൂത്രണത്തിലും ഇവർ വഹിക്കുന്ന പങ്ക് നിസ്തുലമാണ്.

ഇവിടെയും വേർതിരിവ് ശ്രദ്ധിക്കുക:

മെഡിക്കൽ സോഷ്യൽ വർക്കർ NCAHP
സൈക്യാട്രിക് സോഷ്യൽ വർക്കർ NCAHP
ക്ലിനിക്കൽ സോഷ്യൽ വർക്കർ NCAHP
റിഹാബിലിറ്റേഷൻ സോഷ്യൽ വർക്കർ RCI

തൊഴിലിന്റെ പേര് ഒരുപോലെയായതുകൊണ്ട് കാര്യമില്ല; ചട്ടങ്ങൾ പറയുന്ന വിദ്യാഭ്യാസ യോഗ്യതയും ക്ലിനിക്കൽ ഫീൽഡ് വർക്ക് നിബന്ധനകളും പൂർത്തിയാക്കിയിരിക്കണം.

ബി.വോക് (B.Voc) പഠിച്ചവർക്ക് രജിസ്ട്രേഷൻ ഉറപ്പാണോ?:

മൂന്ന് വർഷത്തെ ബി.വോക് (B.Voc) ബിരുദമുണ്ടെന്ന ഒറ്റക്കാരണം കൊണ്ട് NCAHP രജിസ്ട്രേഷൻ ഉറപ്പാകില്ല.

ഒരു കോഴ്സിന്റെ പേരിൽ ‘അലൈഡ് ഹെൽത്ത്’ എന്നോ ‘ഹെൽത്ത്‌കെയർ’ എന്നോ ഉണ്ടായതുകൊണ്ട് മാത്രം കാര്യമില്ല. ആ കോഴ്സും സിലബസും കമ്മീഷൻ അംഗീകരിച്ചിട്ടുണ്ടോ, പഠിച്ച സ്ഥാപനത്തിന് കൃത്യമായ നിയമാനുസൃത അഫിലിയേഷൻ ഉണ്ടോ എന്നിവയാണ് മുഖ്യം.

പ്രത്യേകിച്ച് മെഡിക്കൽ ലാബ് ടെക്നോളജി പോലുള്ള മേഖലകളിൽ, ബി.വോക് എന്ന പേര് മാത്രം കണ്ട് അത് ബി.എസ്.സി എം.എൽ.ടിക്ക് തുല്യമാണെന്ന് തെറ്റിദ്ധരിക്കരുത്. പ്രവേശന ബ്രോഷറുകളിലെ “കൗൺസിൽ അംഗീകാരം”, “സർക്കാർ അംഗീകാരം” തുടങ്ങിയ പരസ്യവാചകങ്ങളിൽ വീഴാതെ, ആ കോഴ്സ് കഴിഞ്ഞാൽ ഏത് നിയമാനുസൃത കൗൺസിലിൽ രജിസ്ട്രേഷൻ ലഭിക്കുമെന്ന് മുൻകൂട്ടി അന്വേഷിക്കണം.

എവിടെയാണ് രജിസ്റ്റർ ചെയ്യേണ്ടത്?:

സംസ്ഥാനത്ത് സ്റ്റേറ്റ് അലൈഡ് ആൻഡ് ഹെൽത്ത്‌കെയർ കൗൺസിൽ നിലവിലുണ്ടെങ്കിൽ അവിടെയാണ് സ്റ്റേറ്റ് രജിസ്റ്ററിൽ പേര് ചേർക്കേണ്ടത്. സംസ്ഥാന കൗൺസിലിൽ രജിസ്റ്റർ ചെയ്യുന്ന വിവരങ്ങൾ പിന്നീട് കേന്ദ്ര രജിസ്റ്ററിലേക്ക് കൈമാറും.

സംസ്ഥാന കൗൺസിൽ ഇല്ലാത്ത സാഹചര്യത്തിൽ കേന്ദ്ര രജിസ്റ്ററിൽ നേരിട്ട് അപേക്ഷിക്കാനുള്ള വ്യവസ്ഥയുമുണ്ട്.

കേരളത്തിൽ കേരള സ്റ്റേറ്റ് അലൈഡ് ആൻഡ് ഹെൽത്ത്‌കെയർ കൗൺസിൽ (KESAHC) ആണ് ഇതിനായുള്ള ചുമതല വഹിക്കുന്നത്. പുതിയ ദേശീയ ചട്ടങ്ങൾ വന്ന സാഹചര്യത്തിൽ, സംസ്ഥാന കൗൺസിലിന്റെ ഔദ്യോഗിക രജിസ്ട്രേഷൻ വിജ്ഞാപനത്തിനായി കാത്തിരിക്കുകയാണ് വേണ്ടത്. അധികം വൈകാതെ ഓൺലൈൻ ആയി രജിസ്ട്രേഷൻ ആരംഭിക്കുമെന്ന് കരുതാം.

https://kesahc.kerala.gov.in/. ഇതാണ് അവരുടെ വെബ്സൈറ്റ്.

ഔദ്യോഗിക അറിയിപ്പുകൾ വരുന്നതിന് മുൻപ് സോഷ്യൽ മീഡിയ ലിങ്കുകൾ വഴിയോ സ്വകാര്യ ഏജൻസികൾ വഴിയോ ആരും രജിസ്ട്രേഷൻ ഫീസ് അടയ്ക്കരുത്.

നിലവിലുള്ള പാരാമെഡിക്കൽ കൗൺസിലുകൾക്ക് എന്ത് സംഭവിക്കും?:

കേരളത്തിൽ അടക്കം ചില സംസ്ഥാനങ്ങളിൽ മുൻപ് തന്നെ പാരാമെഡിക്കൽ കൗൺസിലുകളോ ബോർഡുകളോ നിലവിലുണ്ടായിരുന്നു. NCAHP നിയമം പ്രാബല്യത്തിൽ വന്നതോടെ ദേശീയതലത്തിൽ പുതിയൊരു നിയന്ത്രണ സംവിധാനം വന്നിരിക്കുകയാണ്.

എന്നാൽ, പഴയ കൗൺസിലിൽ രജിസ്റ്റർ ചെയ്തവർക്ക് തനിയെ പുതിയ രജിസ്ട്രേഷൻ കിട്ടിക്കൊള്ളണമെന്നില്ല; അതുപോലെ പഴയ സംവിധാനങ്ങൾ ഒറ്റയടിക്ക് ഇല്ലാതാവുകയുമില്ല. നിലവിലുള്ള രജിസ്ട്രേഷനുകൾ പുതിയ സംവിധാനത്തിലേക്ക് മാറ്റുന്നതിനെക്കുറിച്ചും (Migration/Transition) പരിശോധനകളെക്കുറിച്ചും അതത് സംസ്ഥാന സർക്കാരുകളും കൗൺസിലുകളും നൽകുന്ന ഔദ്യോഗിക ഉത്തരവുകളാണ് ഉദ്യോഗാർത്ഥികൾ പാലിക്കേണ്ടത്.

ഉയർന്ന തൊഴിൽ നിലവാരം, കൃത്യമായ ക്ലിനിക്കൽ പരിശീലനം, തൊഴിൽപരമായ ഉത്തരവാദിത്തം എന്നിവ ഉറപ്പുവരുത്താനാണ് NCAHP ഒരു ദേശീയ ചട്ടക്കൂടൊരുക്കുന്നത്. ഇത് ഉദ്യോഗാർത്ഥികൾക്ക് ഔദ്യോഗിക അംഗീകാരം നൽകുന്നതിനൊപ്പം, ചികിത്സ തേടിയെത്തുന്ന പൊതുജനങ്ങൾക്ക് മുന്നിൽ തങ്ങൾക്ക് സേവനം നൽകുന്ന വ്യക്തിയുടെ വിശ്വാസ്യത ഉറപ്പാക്കാനും സഹായിക്കും.

അതുകൊണ്ട് ഈ രജിസ്ട്രേഷൻ ഒരു നമ്പർ സ്വന്തമാക്കുന്നതിനപ്പുറം, അലൈഡ് ഹെൽത്ത് മേഖലയുടെ പദവിയും പ്രാധാന്യവും ഉയർത്തുന്ന സുപ്രധാന ചുവടുവെപ്പാണ്.

ഇനി ഒരു അലൈഡ് ഹെൽത്ത് കോഴ്സ് തിരഞ്ഞെടുക്കുമ്പോൾ, കേട്ടാൽ ആകർഷണീയമായ പേര് മാത്രം നോക്കി ചേരരുത്; അതിന് പിന്നിലെ ഔദ്യോഗിക അംഗീകാരവും, പ്രാക്ടീസ് ചെയ്യാനുള്ള നിയമപരമായ രജിസ്ട്രേഷനും അതിന് ശേഷമുള്ള തൊഴിൽ സാധ്യതയും കൂടി കണക്കിലെടുക്കണം.

കാരണം, അംഗീകാരമില്ലാത്ത കോഴ്സുകൾ വിദ്യാർത്ഥികൾക്ക് സമ്മാനിക്കുന്നത് ഒരു കരിയറല്ല, വെറുമൊരു അച്ചടിച്ച കടലാസു കഷണം മാത്രമാണ്.

Box 1

NCAHP രജിസ്ട്രേഷൻ ചട്ടങ്ങളിലെ ഒന്നാം ഷെഡ്യൂൾ (Schedule I) പ്രകാരം നിഷ്കർഷിച്ചിട്ടുള്ള പ്രധാന പ്രൊഫഷനുകൾ, അവയുടെ അംഗീകൃത യോഗ്യതാ മാനദണ്ഡങ്ങൾ, ആവശ്യപ്പെടുന്ന പ്രവൃത്തിപരിചയം എന്നിവ മേഖല തിരിച്ച് താഴെ നൽകുന്നു:

1.മെഡിക്കൽ ലബോറട്ടറി സയൻസസ് (MLS) പ്രൊഫഷനുകൾ: മെഡിക്കൽ ലബോറട്ടറി ടെക്നോളജിസ്റ്റ് / സയന്റിസ്റ്റ്*

അടിസ്ഥാന യോഗ്യത: B.Sc Medical Laboratory Technology (MLT) / B.Sc MLS (നിർബന്ധിത ഇന്റേൺഷിപ്പ് ഉൾപ്പെടെ കുറഞ്ഞത് 3 മുതൽ 4 വർഷം വരെ).
പ്രവൃത്തിപരിചയം: അംഗീകൃത ബിരുദമുള്ളവർക്ക് പ്രത്യേക അധിക പ്രവൃത്തിപരിചയം ആവശ്യമില്ല. (ഡിപ്ലോമക്കാർ അലൈഡ് ഹെൽത്ത് പ്രൊഫഷണലായി രജിസ്റ്റർ ചെയ്യുമ്പോൾ നിശ്ചിത ക്ലിനിക്കൽ പ്രവൃത്തിപരിചയം നിർബന്ധമാണ്).

2.ട്രോമ, ബേൺ കെയർ & സർജിക്കൽ / അനസ്തേഷ്യ റിലേറ്റഡ് ടെക്നോളജി

പ്രൊഫഷനുകൾ: ഒപ്പറേഷൻ തിയേറ്റർ (OT) ടെക്നോളജിസ്റ്റ്, അനസ്തേഷ്യ ടെക്നോളജിസ്റ്റ്, എമർജൻസി മെഡിക്കൽ ടെക്നോളജിസ്റ്റ് / പാരാമെഡിക്, പെർഫ്യൂഷനിസ്റ്റ്.
അടിസ്ഥാന യോഗ്യത: ബന്ധപ്പെട്ട വിഷയത്തിൽ റെഗുലർ B.Sc ബിരുദം (ഉദാ: B.Sc OT & Anesthesia Technology, B.Sc Perfusion Technology).
പ്രവൃത്തിപരിചയം: അംഗീകൃത ബിരുദവും ഇന്റേൺഷിപ്പും ഉള്ളവർക്ക് അധിക പ്രവൃത്തിപരിചയം ആവശ്യമില്ല.

3.ഫിസിയോതെറാപ്പി (Physiotherapy)
പ്രൊഫഷനുകൾ: ഫിസിയോതെറാപ്പിസ്റ്റ്
അടിസ്ഥാന യോഗ്യത: BPT (Bachelor of Physiotherapy) - 4 വർഷ പഠനവും 6 മാസത്തെ നിർബന്ധിത റൊട്ടേറ്ററി ഹോസ്പിറ്റൽ ഇന്റേൺഷിപ്പും.
പ്രവൃത്തിപരിചയം: പ്രത്യേക വർക്ക് എക്സ്പീരിയൻസ് ആവശ്യമില്ല.

4.ഒക്യുപേഷണൽ തെറാപ്പി (Occupational Therapy)
പ്രൊഫഷനുകൾ: ഒക്യുപേഷണൽ തെറാപ്പിസ്റ്റ്
അടിസ്ഥാന യോഗ്യത: BOT (Bachelor of Occupational Therapy) - 4 വർഷ പഠനവും 6 മാസത്തെ ഇന്റേൺഷിപ്പും.
പ്രവൃത്തിപരിചയം: പ്രത്യേക അധിക പ്രവൃത്തിപരിചയം ആവശ്യമില്ല.

5.ഒപ്റ്റോമെട്രി (Optometry)
പ്രൊഫഷനുകൾ: ഒപ്റ്റോമെട്രിസ്റ്റ്
അടിസ്ഥാന യോഗ്യത: Bachelor of Optometry (B.Optom / B.Sc Optometry) - 3 വർഷ തിയറിയും 1 വർഷത്തെ ക്ലിനിക്കൽ ഇന്റേൺഷിപ്പും ഉൾപ്പെടെ 4 വർഷ കോഴ്സ്.
പ്രവൃത്തിപരിചയം: അധിക പ്രവൃത്തിപരിചയം ആവശ്യമില്ല.

6.മെഡിക്കൽ റേഡിയോളജി, ഇമേജിങ് & തെറാപ്യൂറ്റിക് ടെക്നോളജി
പ്രൊഫഷനുകൾ: മെഡിക്കൽ ഇമേജിങ് ടെക്നോളജിസ്റ്റ് (X-Ray, CT, MRI), റേഡിയോതെറാപ്പി ടെക്നോളജിസ്റ്റ്, ന്യൂക്ലിയർ മെഡിസിൻ ടെക്നോളജിസ്റ്റ്.
അടിസ്ഥാന യോഗ്യത: B.Sc Medical Imaging Technology / B.Sc Medical Radiologic Technology (MRT) / B.Sc Radiotherapy (3 മുതൽ 4 വർഷം).
പ്രവൃത്തിപരിചയം: അംഗീകൃത ബിരുദധാരികൾക്ക് അധിക പ്രവൃത്തിപരിചയം ആവശ്യമില്ല.

7.കാർഡിയോവാസ്കുലർ, പൾമണറി & ന്യൂറോ സയൻസ് ടെക്നോളജി

പ്രൊഫഷനുകൾ: കാർഡിയാക് കെയർ ടെക്നോളജിസ്റ്റ്, ന്യൂറോ ടെക്നോളജിസ്റ്റ്, റെസ്പിറേറ്ററി തെറാപ്പിസ്റ്റ്, ഡയാലിസിസ് ടെക്നോളജിസ്റ്റ് (Renal Replacement Technology).
അടിസ്ഥാന യോഗ്യത: ബന്ധപ്പെട്ട സ്പെഷ്യലൈസേഷനിലുള്ള 3 മുതൽ 4 വർഷ B.Sc ബിരുദം (ക്ലിനിക്കൽ ഇന്റേൺഷിപ്പ് സഹിതം).
പ്രവൃത്തിപരിചയം: അധിക പ്രവൃത്തിപരിചയം ആവശ്യമില്ല.

8.ന്യൂട്രീഷൻ സയൻസ് പ്രൊഫഷണലുകൾ

പ്രൊഫഷനുകൾ: ക്ലിനിക്കൽ ഡയറ്റീഷ്യൻ, ഫുഡ് & ന്യൂട്രീഷനിസ്റ്റ്.
അടിസ്ഥാന യോഗ്യത: B.Sc Clinical Nutrition & Dietetics / Food Science & Nutrition, തുടർന്ന് M.Sc അല്ലെങ്കിൽ നിർബന്ധിത ഹോസ്പിറ്റൽ ഡയറ്ററ്റിക്സ് ഇന്റേൺഷിപ്പ്.
പ്രവൃത്തിപരിചയം: ക്ലിനിക്കൽ പ്രാക്ടീസിന് ഹോസ്പിറ്റൽ ഇന്റേൺഷിപ്പ് അനിവാര്യമാണ്.

9.ബിഹേവിയറൽ ഹെൽത്ത് സയൻസസ് (സൈക്കോളജി)
പ്രൊഫഷനുകൾ: സൈക്കോളജിസ്റ്റ് (ജനറൽ / ബിഹേവിയറൽ)
അടിസ്ഥാന യോഗ്യത: സൈക്കോളജിയിൽ ബിരുദവും ബിരുദാനന്തര ബിരുദവും (BA/B.Sc + MA/M.Sc Psychology).
പ്രവൃത്തിപരിചയം (നിർബന്ധം): നിശ്ചിത ഹെൽത്ത് കെയർ ക്രമീകരണങ്ങളിൽ (Hospital / Clinic / Mental Health Setting) നേടിയ കുറഞ്ഞത് 1 മുതൽ 2 വർഷം വരെയുള്ള പ്രവൃത്തിപരിചയം (പഠന റൂട്ടിന് അനുസൃതമായി ഷെഡ്യൂൾ I-ൽ വ്യക്തമാക്കിയ പ്രകാരം).

10.ഹെൽത്ത് കെയർ സോഷ്യൽ വർക്ക്
പ്രൊഫഷനുകൾ: മെഡിക്കൽ സോഷ്യൽ വർക്കർ, സൈക്യാട്രിക് സോഷ്യൽ വർക്കർ, ക്ലിനിക്കൽ സോഷ്യൽ വർക്കർ.
അടിസ്ഥാന യോഗ്യത: MSW (Medical & Psychiatric Social Work സ്പെഷ്യലൈസേഷൻ) അല്ലെങ്കിൽ തത്തുല്യ ബിരുദാനന്തര ബിരുദം.
പ്രവൃത്തിപരിചയം (നിർബന്ധം): ആശുപത്രികൾ, ഡീ-അഡിക്ഷൻ സെന്ററുകൾ, മെന്റൽ ഹെൽത്ത് കേന്ദ്രങ്ങൾ എന്നിവയിൽ ക്ലിനിക്കൽ ഫീൽഡ് വർക്കും നിശ്ചിത കാലയളവിലെ പ്രവൃത്തിപരിചയവും

11.ഹെൽത്ത് ഇൻഫർമേഷൻ മാനേജ്‌മെന്റ് & ഹെൽത്ത് ഇൻഫോർമാറ്റിക്സ് (HIM) പ്രൊഫഷനുകൾ:

ഹെൽത്ത് ഇൻഫർമേഷൻ മാനേജ്‌മെന്റ് പ്രൊഫഷണൽ / മെഡിക്കൽ റെക്കോർഡ് ഓഫീസർ (MRO)

ഹെൽത്ത് ഇൻഫോർമാറ്റിക്സ് സ്പെഷ്യലിസ്റ്റ് / ക്ലിനിക്കൽ കോഡർ

അടിസ്ഥാന യോഗ്യത:

ബി.എസ്.സി ഹെൽത്ത് ഇൻഫർമേഷൻ മാനേജ്‌മെന്റ് (B.Sc HIM / B.Sc Medical Records Science) — റഗുലർ 3 വർഷ പഠനവും നിശ്ചിത ഹോസ്പിറ്റൽ ഇന്റേൺഷിപ്പും.

അല്ലെങ്കിൽ തത്തുല്യ ബിരുദാനന്തര ബിരുദം (M.Sc HIM).

പ്രവൃത്തിപരിചയം:

അംഗീകൃത റെഗുലർ ഡിഗ്രിയും ഹോസ്പിറ്റൽ ട്രെയിനിംഗും പൂർത്തിയാക്കിയവർക്ക് അധിക പ്രവൃത്തിപരിചയം നിർബന്ധമില്ല.

എന്നാൽ ഡിപ്ലോമ (Diploma in Medical Record Technology - DMRT) വഴി വരുന്നവർക്കും നിലവിൽ ജോലി ചെയ്യുന്നവർക്കും നിശ്ചിത ആശുപത്രി പ്രവൃത്തിപരിചയം ആവശ്യമാണ്.

12.കമ്മ്യൂണിറ്റി കെയർ & പബ്ലിക് ഹെൽത്ത് പ്രൊഫഷണലുകൾ (Community Care & Public Health)

പ്രൊഫഷനുകൾ: പബ്ലിക് ഹെൽത്ത് ഓഫീസർ / പ്രാക്ടീഷണർ (Public Health Practitioners).
അടിസ്ഥാന യോഗ്യത: മാസ്റ്റർ ഓഫ് പബ്ലിക് ഹെൽത്ത് (MPH) അല്ലെങ്കിൽ ബി.എസ്.സി പബ്ലിക് ഹെൽത്ത്.
പ്രവൃത്തിപരിചയം: കമ്മ്യൂണിറ്റി ഹെൽത്ത് പ്രോജക്ടുകളിലും പൊതുജനാരോഗ്യ രംഗത്തുമുള്ള ഫീൽഡ് പ്രവൃത്തിപരിചയം പരിഗണിക്കുന്നു.

13.പോഡിയാട്രിക് തെറാപ്പി (Podiatric Therapy)
പ്രൊഫഷനുകൾ: പോഡിയാട്രിസ്റ്റ് / ഫൂട്ട് കെയർ തെറാപ്പിസ്റ്റ് (പ്രമേഹ രോഗികളിലെ കാൽ സംരക്ഷണം, ആർത്രൈറ്റിസ് സംബന്ധമായ ഫൂട്ട് കെയർ തുടങ്ങിയവ കൈകാര്യം ചെയ്യുന്നവർ).
അടിസ്ഥാന യോഗ്യത: പോഡിയാട്രിക് മെഡിസിൻ / തെറാപ്പിയിൽ ബിരുദമോ പി.ജി ഡിപ്ലോമയോ.
പ്രവൃത്തിപരിചയം: പ്രമേഹ പരിചരണ/സർജിക്കൽ ആശുപത്രികളിലെ ക്ലിനിക്കൽ പരിശീലനം.

പ്രത്യേക ശ്രദ്ധയ്ക്ക്: ബിരുദത്തിനൊപ്പം പ്രവൃത്തിപരിചയം ആവശ്യമില്ലാത്ത ക്ലിനിക്കൽ ടെക്നോളജി കോഴ്സുകൾക്ക് നിശ്ചിത മണിക്കൂറുകളിലുള്ള ഹോസ്പിറ്റൽ ഇന്റേൺഷിപ്പ് നിർബന്ധമാണ്. എന്നാൽ സൈക്കോളജി, സോഷ്യൽ വർക്ക് തുടങ്ങിയ ഹ്യൂമാനിറ്റീസ് അടിസ്ഥാനമാക്കിയുള്ള ഹെൽത്ത് സയൻസ് ശാഖകൾക്ക് 'ഹെൽത്ത് സെറ്റിങ്സ്' വഴിയുള്ള നേരിട്ടുള്ള പ്രവൃത്തിപരിചയം തെളിയിക്കുന്ന രേഖകൾ രജിസ്ട്രേഷന് നിർണായകമാണ്

Box 2

NCAHPയുടെ പത്ത് പ്രധാന വിഭാഗങ്ങൾ: ആരൊക്കെ, എന്ത് യോഗ്യത?

NCAHP Registration Regulations-ലെ Schedule I പ്രകാരം Allied and Healthcare Professions-നെ പത്ത് പ്രധാന recognised categories-ലാണ് ക്രമീകരിച്ചിരിക്കുന്നത്. ഓരോ category-യിലും ഒന്നിലധികം professions ഉണ്ട്. ഓരോ profession-നും അംഗീകരിച്ചിട്ടുള്ള qualification-കളും course duration-ഉം, ആവശ്യമായിടത്ത് health-setting experience-ഉം Schedule I-ൽ പ്രത്യേകം നൽകിയിട്ടുണ്ട്.

1. Medical Laboratory and Life Sciences

Medical Laboratory Technologist, Biotechnologist, Medical Biochemist, Medical Microbiologist, Molecular Biologist, Geneticist, Cytotechnologist, Histotechnologist, Hematology Technologist തുടങ്ങിയ professions ഈ വിഭാഗത്തിലുണ്ട്.

Medical Laboratory Technologist-ന് B.MLS, B.Sc Medical Laboratory Science/Technology തുടങ്ങിയ degree routes മുതൽ, നിശ്ചിത മാനദണ്ഡങ്ങൾ പാലിക്കുന്ന രണ്ട് വർഷത്തെ DMLT വരെയുള്ള qualifications Schedule I അംഗീകരിക്കുന്നു. Biotechnologist ആയി രജിസ്റ്റർ ചെയ്യുന്നതിന് M.Sc Biotechnology-ക്കൊപ്പം healthcare രംഗത്ത് കുറഞ്ഞത് ഒരു വർഷത്തെ experience ആവശ്യപ്പെടുന്നുണ്ട്.

2. Trauma, Burn Care and Surgical/Anaesthesia Related Technology

Advanced Care Paramedic, Emergency Medical Technologist, Anaesthesia and Operation Theatre Technologist, Endoscopy and Laparoscopy Technologist തുടങ്ങിയ professions ഈ വിഭാഗത്തിൽപ്പെടുന്നു.

ഇവയിൽ B.EMT, B.Sc Emergency Medical Services, B.Sc Trauma/Emergency Care, B.AOTT, B.Sc Anaesthesia Technology, B.Sc Operation Theatre Technology, B.Sc Endoscopy Technology തുടങ്ങിയ degree routes ഉൾപ്പെടുന്നു. ചില diploma routes-ുകളും Schedule I അംഗീകരിക്കുന്നുണ്ട്, എന്നാൽ അവയ്ക്ക് കുറഞ്ഞത് 2000 മണിക്കൂർ training ഉൾപ്പെടുകയും recognised institution/programme ആയിരിക്കണമെന്നുമുള്ള നിബന്ധനയുണ്ട്.

3. Physiotherapy Professional

ഇവിടെ പ്രധാന profession Physiotherapist ആണ്.

B.PT ആണ് പ്രധാന recognised qualification. പഴയ admission വർഷങ്ങളിലെ ചില B.Sc Physiotherapy routes-ുകളും Schedule I അംഗീകരിക്കുന്നുണ്ട്. നിലവിലുള്ള BPT programmes-ൽ course duration-നൊപ്പം prescribed internship ഉൾപ്പെടുന്നു. പഴയ DPT qualification-നും പ്രത്യേക വ്യവസ്ഥയുണ്ട്.

4. Nutrition Science Professionals

Dietician, Nutritionist തുടങ്ങിയ professions ഈ വിഭാഗത്തിലാണ്.

B.Sc Nutrition and Dietetics, B.Sc Clinical Nutrition, B.Sc Food and Nutrition, B.Sc Nutrition and Dietetics തുടങ്ങിയ നിരവധി degree routes Schedule I-ൽ ഉൾപ്പെടുത്തിയിട്ടുണ്ട്. ചില routes-ൽ postgraduate qualification കൂടി ആവശ്യമാണ്. Dietician വിഭാഗത്തിൽ clinical internship/training-നും പ്രാധാന്യം നൽകിയിട്ടുണ്ട്.

5. Ophthalmic Sciences Professional

ഈ വിഭാഗത്തിലെ പ്രധാന professions Optometrist, Ophthalmic Assistant, Ophthalmic Technician തുടങ്ങിയവയാണ്.

B.Optom, B.Sc Optometry, B.Sc Ophthalmic Technology തുടങ്ങിയ degree qualifications അംഗീകരിച്ചിട്ടുണ്ട്. അതോടൊപ്പം കുറഞ്ഞത് 2000 മണിക്കൂർ training ഉള്ള വിവിധ diploma qualifications-ുകളും Schedule I-ൽ ഉൾപ്പെടുന്നു.

6. Occupational Therapist

ഈ category-യിൽ Occupational Therapist എന്ന profession ആണ്.

B.OT, BOT, B.Sc Occupational Therapy, B.Sc (Hons) Occupational Therapy തുടങ്ങിയ വിവിധ degree routes Schedule I-ൽ അംഗീകരിച്ചിട്ടുണ്ട്. കുറഞ്ഞത് 2000 മണിക്കൂർ training ഉള്ള ചില diploma qualifications-ുകളും ഉൾപ്പെടുത്തിയിട്ടുണ്ട്.

7. Community Care, Behavioural Health Sciences and Other Professionals

ഇതാണ് ഏറ്റവും വൈവിധ്യമാർന്ന category-കളിലൊന്ന്.

ഇതിൽ Medical Social Worker, Psychiatric Social Worker, Clinical Social Worker, Psychologist തുടങ്ങിയ professions ഉൾപ്പെടുന്നു. ഇതിന് പുറമെ Community Health, Behavioural Health, Counselling തുടങ്ങിയ മേഖലകളിലെ നിരവധി professions-ഉം പട്ടികയിലുണ്ട്.

Social Work വിഭാഗത്തിൽ B.MPSW, BSW/BA Social Work, MSW/MA Social Work തുടങ്ങിയ വിവിധ qualification routes നൽകിയിട്ടുണ്ട്. ഉദാഹരണത്തിന് BSW/BA Social Work route-ൽ 3 മുതൽ 4 വർഷം വരെ health-setting experience ആവശ്യപ്പെടുന്നു. ചില MSW/MA Social Work routes-ൽ 2 വർഷത്തെ health-setting experience ആവശ്യമാണ്. MPhil Clinical Social Work, MPhil Psychiatric Social Work തുടങ്ങിയ prescribed qualifications-ക്കും പ്രത്യേക വ്യവസ്ഥകളുണ്ട്.

Psychology വിഭാഗത്തിലും qualification അനുസരിച്ച് health-setting experience നിശ്ചയിച്ചിട്ടുണ്ട്. UG/PG Psychology routes മുതൽ counselling, psychotherapy, applied psychology തുടങ്ങിയ പല qualification pathways-ുകളും Schedule I-ൽ നൽകിയിട്ടുണ്ട്. അതേസമയം RCI-യിൽ രജിസ്റ്റർ ചെയ്യാൻ അർഹനായ Clinical Psychologist-ന് NCAHP registration അനുവദിക്കില്ല എന്ന് Regulations പ്രത്യേകം വ്യക്തമാക്കുന്നു.

8. Medical Radiology, Imaging and Therapeutic Technology

Medical Radiology and Imaging Technologist, Radiographer, MRI/CT Technologist, Nuclear Medicine Technologist, Radiotherapy Technologist, Medical Physicist തുടങ്ങിയ professions ഈ വിഭാഗത്തിലാണ്.

B.Sc Medical Radiology and Imaging Technology, B.Sc Radiography and Imaging Technology, B.Sc Radiation Technology, B.Sc Nuclear Medicine Technology തുടങ്ങിയ degree routes ഉൾപ്പെടുന്നു. നിശ്ചിത 2000 മണിക്കൂർ training ഉള്ള diploma routes-ുകളും Schedule I-ൽ അംഗീകരിച്ചിട്ടുണ്ട്.

9. Medical Technologist and Physician Associates

ഈ category-യിൽ Biomedical Engineer, Medical Equipment Technologist, Physician Associate, Cardiovascular Technologist, Perfusionist, Respiratory Technologist, Dialysis Therapy Technologist തുടങ്ങിയ professions ഉൾപ്പെടുന്നു.

Physician Associate-ന് B.PA ഉൾപ്പെടെ വിവിധ recognised qualification routes ഉണ്ട്. Cardiovascular Technology, Perfusion Technology, Respiratory Technology, Dialysis Therapy Technology തുടങ്ങിയ മേഖലകളിലും degree, diploma routes Schedule I-ൽ നൽകിയിട്ടുണ്ട്.

10. Health Information Management

Health Information Management Professional, Medical Records/Health Information Technologist, Clinical Coder, Medical Records Secretary, Medical Transcriptionist തുടങ്ങിയ professions ഈ വിഭാഗത്തിൽപ്പെടുന്നു.

D.HIM, B.Sc Health Information Management, B.Sc Medical Records Science, B.Sc Medical Record Technology, M.Sc HIM തുടങ്ങിയ വിവിധ qualifications Schedule I-ൽ അംഗീകരിച്ചിട്ടുണ്ട്. Clinical Coder പോലുള്ള ചില professions-ന് 2000 മണിക്കൂർ training ഉൾപ്പെടുന്ന recognised diploma routes-ുകളും ഉണ്ട്.

Experience സംബന്ധിച്ച് ഒരു പ്രധാന കാര്യം

മുകളിലെ പട്ടിക വായിക്കുമ്പോൾ ഒരു കാര്യം പ്രത്യേകം ഓർക്കണം. എല്ലാ professions-നും experience requirement ഒരുപോലെയല്ല.

പല clinical technology professions-ലും recognised qualification-നൊപ്പം prescribed internship/training പൂർത്തിയാക്കിയാൽ പ്രത്യേക അധിക work experience ആവശ്യമില്ല. എന്നാൽ ചില professions-ൽ, പ്രത്യേകിച്ച് Psychology, Social Work, Biotechnologist തുടങ്ങിയവയിൽ, qualification route അനുസരിച്ച് health-setting experience നിർബന്ധമാണ്.

അതുകൊണ്ട് “Degree ഉണ്ടെങ്കിൽ registration കിട്ടും” എന്നോ “എല്ലാവർക്കും experience വേണം” എന്നോ പൊതുവായി പറയുന്നത് ശരിയല്ല.

സ്വന്തം profession-ന് Schedule I-ൽ നൽകിയിരിക്കുന്ന exact qualification, course duration, experience requirement എന്നിവയാണ് അന്തിമമായി നോക്കേണ്ടത്.

Box3

‘ ‘ഹെൽത്ത്‌ കെയർ പ്രൊഫഷണലും അലൈഡ് ഹെൽത്ത് പ്രൊഫഷണലും തമ്മിലുള്ള വ്യത്യാസം

NCAHPയെക്കുറിച്ച് പറയുമ്പോൾ പലരും പലരെയും കുഴക്കുന്ന ഒരു കാര്യമുണ്ട്: “Allied Health Professional” എന്നും “Healthcare Professional” എന്നും പറയുന്നത് രണ്ടും ഒരേ കാര്യമല്ലേ?*

ആരോഗ്യരംഗത്ത് രോഗനിർണയം, ചികിത്സ, പുനരധിവാസം, രോഗീപരിചരണം തുടങ്ങിയ മേഖലകളിൽ പ്രവർത്തിക്കുന്നവരാണെങ്കിലും, NCAHP Act ഇവയെ വിദ്യാഭ്യാസത്തിന്റെ ദൈർഘ്യം, പരിശീലന മണിക്കൂറുകൾ, യോഗ്യത, professional role എന്നിവയുടെ അടിസ്ഥാനത്തിൽ വ്യത്യസ്തമായി നിർവചിക്കുന്നുണ്ട്.

അലൈഡ് ഹെൽത്ത് പ്രൊഫഷണൽ (Allied Health Professional):

കുറഞ്ഞത് 2000 മണിക്കൂർ വിദ്യാഭ്യാസവും പരിശീലനവും ഉൾപ്പെടുന്ന 2 മുതൽ 4 വർഷം വരെ ദൈർഘ്യമുള്ള diploma അല്ലെങ്കിൽ degreeൾ* നേടിയ associate, technician, technologist തുടങ്ങിയവർ ഈ വിഭാഗത്തിൽപ്പെടുന്നു.

Medical Laboratory Technologist, Radiology Technologist, Anaesthesia Technologist, Operation Theatre Technologist തുടങ്ങിയവർ ഉദാഹരണങ്ങളാണ്.

ഹെൽത്ത്‌കെയർ പ്രൊഫഷണൽ (Healthcare Professional):

കുറഞ്ഞത് 3600 മണിക്കൂർ വിദ്യാഭ്യാസവും പരിശീലനവും ഉൾപ്പെടുന്ന 3 മുതൽ 6 വർഷം വരെ ദൈർഘ്യമുള്ള degree നേടിയ scientist, therapist തുടങ്ങിയ പ്രഫഷനലുകളാണ് ഈ വിഭാഗത്തിൽപ്പെടുന്നത്.

Physiotherapist, Occupational Therapist, Optometrist, Nutritionist/Dietician, Psychologist* തുടങ്ങിയവർ ഇതിൽപ്പെടുന്നു.

ഇവരിൽ പ്രത്യേകിച്ച് Physiotherapist, Occupational Therapist

എന്നിവർക്ക് സ്വന്തം professional scope-നുള്ളിൽ independent practice നടത്താനുള്ള നിയമപരമായ അംഗീകാരം ശ്രദ്ധേയമാണ്. അതായത് multidisciplinary team-ന്റെ ഭാഗമായി പ്രവർത്തിക്കുന്നതിനൊപ്പം, സ്വന്തം professional services സ്വതന്ത്രമായും നൽകാൻ കഴിയും.

ഒറ്റവാക്കിൽ പറഞ്ഞാൽ:

Allied Health → 2000 മണിക്കൂർ, 2–4 വർഷം, Diploma/Degree

Healthcare → 3600 മണിക്കൂർ, 3–6 വർഷം, Degree

ഇവിടെ മറ്റൊരു കാര്യം കൂടി ശ്രദ്ധിക്കണം. Audiologist, Speech-Language Pathologist, Prosthetist & Orthotist, Clinical Psychologist, Rehabilitation Psychologist തുടങ്ങിയ RCIയുടെ പരിധിയിൽ വരുന്ന professions ആണ്. അവരുടെ നിയന്ത്രണാധികാരം Rehabilitation Council of India (RCI) ക്കാണ്.

Article By: Nizar Peruvad
CIGI Career Team

View Details View Details

Mujeeb Kaindar
2026-10-19

പ്രൊഫഷണൽ വിദ്യാർത്ഥികൾക്ക് ആശ്വാസമായി വഖഫ് ബോർഡിന്റെ പലിശരഹിത ലോൺ സ്കോളർഷിപ്പ്: അപേക്ഷകൾ ക്ഷണിച്ചു

2026-27 അധ്യയന വർഷത്തിൽ പ്രൊഫഷണൽ കോഴ്‌സുകളുടെ ഒന്നാം വർഷത്തിലേക്ക് പ്രവേശനം നേടിയ മുസ്ലിം വിദ്യാർത്ഥികൾക്ക് കേരള സംസ്ഥാന വഖഫ് ബോർഡ് പലിശരഹിത ലോൺ സ്കോളർഷിപ്പിനായി അപേക്ഷ ക്ഷണിച്ചു. അർഹരായ വിദ്യാർത്ഥികൾക്ക് പഠനസഹായമായി പ്രതിമാസം 5,000 രൂപ വീതമാണ് സ്കോളർഷിപ്പായി അനുവദിക്കുന്നത്. സംസ്ഥാനത്തൊട്ടാകെ ലഭ്യമാകുന്ന അപേക്ഷകളിൽ നിന്നും യോഗ്യതയുടെ അടിസ്ഥാനത്തിൽ 200 വിദ്യാർത്ഥികളെയാണ് ഈ പദ്ധതിയിലേക്ക് തിരഞ്ഞെടുക്കുന്നത്.

യോഗ്യതാ മാനദണ്ഡങ്ങൾ:

2026-27 അധ്യയന വർഷത്തിൽ പ്രൊഫഷണൽ കോഴ്സുകൾക്ക് ഒന്നാം വർഷം പഠിക്കുന്ന മുസ്ലിം വിദ്യാർത്ഥികൾക്ക് മാത്രമാണ് അപേക്ഷിക്കാൻ സാധിക്കുക.
അപേക്ഷകർ മുൻ പരീക്ഷയിൽ (പ്ലസ് ടു അല്ലെങ്കിൽ 12-ാം ക്ലാസ്സ്) കുറഞ്ഞത് 80 ശതമാനം മാർക്കോ അല്ലെങ്കിൽ തത്തുല്യ ഗ്രേഡോ കരസ്ഥമാക്കിയിരിക്കണം.
അപേക്ഷകന്റെ കുടുംബത്തിന്റെ വാർഷിക വരുമാനം 2,50,000 രൂപയിൽ താഴെ ആയിരിക്കണം.

അപേക്ഷിക്കേണ്ട വിധവും സമർപ്പിക്കേണ്ട രേഖകളും:

അപേക്ഷാഫോം കേരള സംസ്ഥാന വഖഫ് ബോർഡിൻ്റെ ഔദ്യോഗിക വെബ്സൈറ്റായ www.keralastatewakfboard.in ൽ നിന്നും നേരിട്ട് ഡൗൺലോഡ് ചെയ്യാവുന്നതാണ്.
അപേക്ഷാ ഫോറത്തിൽ വിദ്യാർത്ഥിയുടെ പേര്, വിലാസം, ജനനത്തീയതി, ഫോൺ നമ്പർ, ഇമെയിൽ, രക്ഷിതാവിന്റെ വിവരങ്ങൾ, വാർഷിക വരുമാനം, യോഗ്യതാ പരീക്ഷയുടെ അക്കാദമിക് വിവരങ്ങൾ, പ്രവേശനം ലഭിച്ച സ്ഥാപനത്തിന്റെയും കോഴ്സിന്റെയും വിവരങ്ങൾ എന്നിവ വ്യക്തമായി രേഖപ്പെടുത്തണം.
അപേക്ഷയോടൊപ്പം പ്ലസ് ടു അല്ലെങ്കിൽ 12-ാം ക്ലാസ് പരീക്ഷയുടെ മാർക്ക് ലിസ്റ്റിൻ്റെ പകർപ്പ് നിർബന്ധമായും ഉള്ളടക്കം ചെയ്തിരിക്കണം.
ഫോറത്തിൽ അപേക്ഷകനായ വിദ്യാർത്ഥിയും രക്ഷിതാവും ഒപ്പിട്ട സത്യവാങ്മൂലം ഉണ്ടായിരിക്കണം.
പൂരിപ്പിച്ച അപേക്ഷകൾ അയക്കേണ്ട വിലാസം: ചീഫ് എക്സിക്യൂട്ടീവ് ഓഫീസർ, കേരള സംസ്ഥാന വഖഫ് ബോർഡ്, ഇൻ്റർനാഷണൽ സ്റ്റേഡിയത്തിന് സമീപം, വി.ഐ.പി. റോഡ്, കലൂർ, കൊച്ചി - 682017.
അപേക്ഷകൾ 2026 ഒക്ടോബർ 31-നകം വിലാസത്തിൽ ലഭ്യമാകേണ്ടതാണ്. നിശ്ചിത തീയതിക്ക് ശേഷം ലഭിക്കുന്ന അപേക്ഷകൾ യാതൊരു കാരണവശാലും പരിഗണിക്കുന്നതല്ല.
കൂടുതൽ വിവരങ്ങൾക്കും സംശയനിവാരണങ്ങൾക്കായി 0484-2101485, 0484-2342485, 0484-2346091 എന്നീ ഫോൺ നമ്പറുകളിലോ [email protected] എന്ന ഇമെയിൽ വിലാസത്തിലോ ബന്ധപ്പെടാവുന്നതാണ്.

ജാമ്യ വ്യവസ്ഥകൾ:

പദ്ധതിയിലേക്ക് തിരഞ്ഞെടുക്കപ്പെടുന്ന വിദ്യാർത്ഥികൾ വഖഫ് ബോർഡ് ആവശ്യപ്പെടുന്ന പ്രകാരം 200 രൂപയുടെ മുദ്രപത്രത്തിൽ കരാർ തയ്യാറാക്കി ഒപ്പിടുകയും രണ്ട് ജാമ്യക്കാരെ ഹാജരാക്കുകയും വേണം.
കരാറിന്റെ എല്ലാ പേജുകളിലും വായ്പയെടുക്കുന്ന വിദ്യാർത്ഥിയും രണ്ട് ജാമ്യക്കാരും ഒപ്പിടേണ്ടതാണ്.
ജാമ്യക്കാരിൽ ഒരാൾ സർക്കാർ, അർദ്ധസർക്കാർ, പൊതുമേഖലാ സ്ഥാപനം, സ്വയംഭരണ സ്ഥാപനങ്ങൾ, സഹകരണ ബാങ്ക് അല്ലെങ്കിൽ സൊസൈറ്റി എന്നിവയിലൊന്നിൽ ജോലി ചെയ്യുന്ന വ്യക്തിയായിരിക്കണം.
അതല്ലെങ്കിൽ, ജാമ്യക്കാരിൽ ഒരാൾ വായ്പയെടുക്കുന്ന വിദ്യാർത്ഥിയുടെ പിതാവ്, മാതാവ്, സഹോദരൻ, സഹോദരി എന്നിവരിൽ വരുമാനമുള്ള വ്യക്തിയായിരുന്നാലും മതിയാകും.
ജാമ്യക്കാരനായി ഹാജരാകുന്ന ഉദ്യോഗസ്ഥൻ പ്രത്യേക ഫോമിൽ ജാമ്യ ഉറപ്പ് നൽകേണ്ടതുണ്ട്.

തിരിച്ചടവ് വ്യവസ്ഥകളും പിഴയും:

വിദ്യാർത്ഥി പഠിക്കുന്ന കോഴ‌് പൂർത്തിയാക്കി 6 മാസത്തിനുശേഷമാണ് വായ്പയുടെ തിരിച്ചടവ് ആരംഭിക്കേണ്ടത്.
തിരിച്ചടവ് ആരംഭിച്ച് തുടർന്ന് വരുന്ന 24 മാസത്തിനകം വായ്‌പാ തുക പൂർണ്ണമായി അടച്ചു തീർക്കേണ്ടതാണ്.
കൃത്യമായി തിരിച്ചടയ്ക്കുന്ന വായ്‌പാ തുകയ്ക്ക് യാതൊരുവിധ പലിശയും ബോർഡ് ഈടാക്കുന്നതല്ല.
എന്നാൽ, നിശ്ചിത തിരിച്ചടവ് കാലാവധി കഴിഞ്ഞും തുക അടയ്ക്കാതെ കുടിശ്ശിക വരുത്തുന്ന പക്ഷം, 12 ശതമാനം നിരക്കിൽ നഷ്ടപരിഹാരത്തുക പിഴയായി ഈടാക്കുന്നതാണ്. തുക യഥാസമയം തിരിച്ചടയ്ക്കാത്തതുമൂലം ബോർഡിനുണ്ടാകുന്ന സാമ്പത്തിക നഷ്ടത്തിനും, പ്രസ്തു‌ത തുക മറ്റൊരു അർഹനായ വിദ്യാർത്ഥിക്ക് അനുവദിക്കാൻ കഴിയാത്തതുമൂലമുള്ള അവസരനഷ്ടത്തിനും പരിഹാരമായാണ് ഈ തുക ഈടാക്കുന്നത്.

waqf board loan2026.pdf

Article By: Mujeebulla K.M
CIGI Career Team

View Details View Details

Mujeeb Kaindar
2026-10-19

എ.ഐ കാലത്തെ അതിജീവനം: വഴികാട്ടികളാകേണ്ടത് അറിവും അലിവുമുള്ളവർ

"നിർമ്മിത ബുദ്ധി സൂപ്പർ ഇൻ്റലിജൻസാവുന്നു. എ.ഐ മനുഷ്യൻ്റെ അന്തകനുമാവുന്നു. ഈ കാലത്ത് നിലനിൽപിനായി നമ്മൾ എന്ത് ചെയ്യണം?"

സാധാരണഗതിയിൽ ഗുഡ് മോർണിംഗ് മെസ്സേജുകളോ, സ്മൈലികളോ വരാറുള്ള എൻ്റെ ഫോണിൻ്റെ സ്ക്രീനിൽ ഇന്ന് (ഒക്ടോബർ 6 ന് ) പുലർച്ചെ തെളിഞ്ഞത് ഈയൊരു സന്ദേശമാണ്. അയച്ചത് ഒരു പത്താം ക്ലാസുകാരൻ. ഒറ്റനോട്ടത്തിൽ ഒരു ഹോളിവുഡ് സയൻസ് ഫിക്ഷൻ സിനിമയിലെ ഡയലോഗ് പോലെയോ, അർനോൾഡ് ഷ്വാസ്നെഗറുടെ 'ടെർമിനേറ്റർ' സിനിമയുടെ തിരക്കഥ പോലെയോ തോന്നാം. പക്ഷേ, ആ സന്ദേശത്തിന് പിന്നിൽ വലിയൊരു യാഥാർത്ഥ്യമുണ്ടായിരുന്നു; ഇന്നത്തെ തലമുറയുടെ ഏറ്റവും വലിയൊരു ചോദ്യം അതിലുണ്ടായിരുന്നു.

ചെറിയൊരു പുഞ്ചിരിയോടെയാണ് ഞാൻ ആ മെസ്സേജ് വായിച്ചു തുടങ്ങിയതെങ്കിലും, പെട്ടെന്ന് തന്നെ ആ പുഞ്ചിരി മാഞ്ഞു. കാരണം, ആ വരികളിൽ ഒളിഞ്ഞിരിക്കുന്നത് വെറുമൊരു കൗതുകമല്ല, മറിച്ച് വലിയൊരു ഭയമാണ്. അനിശ്ചിതത്വമാണ്. ഇത് കേവലമൊരു ആശങ്കയല്ല; തങ്ങൾക്ക് മുന്നിൽ തുറന്നുകിടക്കുന്ന, മുൻകൂട്ടി പ്രവചിക്കാൻ കഴിയാത്തത്ര വേഗത്തിൽ മാറിക്കൊണ്ടിരിക്കുന്ന ഭാവിയെക്കുറിച്ചുള്ള അതിയായ ആകാംക്ഷയാണിത്. ഒരുപക്ഷേ, കഴിഞ്ഞ പത്തോ ഇരുപതോ വർഷങ്ങളായി നാം കണ്ടുശീലിച്ച ലോകമല്ല നാളെയുടേത് എന്ന യാഥാർത്ഥ്യം അവനെ വല്ലാതെ ഭയപ്പെടുത്തുന്നുണ്ടാകാം. ഈ ആകാംക്ഷ ആ പത്താം ക്ലാസുകാരനിൽ മാത്രമല്ല, അവനെപ്പോലുള്ള ലക്ഷക്കണക്കിന് വിദ്യാർത്ഥികളിലും, അവരുടെ ഭാവിയോർത്ത് നെഞ്ചിടിപ്പോടെ കാത്തിരിക്കുന്ന രക്ഷിതാക്കളിലുമുണ്ട്.

നമുക്കൊന്ന് പിന്നോട്ട് നടന്നു നോക്കാം. ഒരു പത്തോ പതിനഞ്ചോ വർഷം മുൻപ്, കരിയർ ഗൈഡൻസിനായി കുട്ടികൾ ചോദിച്ചിരുന്നത് എന്തൊക്കെയായിരുന്നു? "ഏത് കോഴ്സ് പഠിച്ചാൽ പെട്ടെന്ന് ജോലി കിട്ടും?", "സയൻസ് എടുത്താൽ എൻജിനീയർ ആകാമോ?", അല്ലെങ്കിൽ "ഏത് ഫീൽഡിലാണ് കൂടുതൽ ശമ്പളം കിട്ടുക?", "ഗൾഫിൽ പോകാൻ എന്ത് പഠിക്കണം?" എന്നൊക്കെയുള്ള വളരെ ലളിതവും പ്രായോഗികവുമായ ചോദ്യങ്ങളായിരുന്നു അവ. അതിനൊക്കെ വ്യക്തമായ ഉത്തരങ്ങളും നമ്മുടെ പക്കലുണ്ടായിരുന്നു. എന്നാൽ ഇന്ന് ആ തലമുറ മാറി. ചോദ്യങ്ങളുടെ സ്വഭാവം അടിമുടി മാറി. ജനറേഷൻ ഇസഡ് (Gen Z) എന്നും ജനറേഷൻ ആൽഫ (Gen Alpha) എന്നും വിളിക്കപ്പെടുന്ന ഇന്നത്തെ കുട്ടികൾ ചോദിക്കുന്നത് തികച്ചും വ്യത്യസ്തമായ കാര്യങ്ങളാണ്.

"ഞാൻ ഇപ്പോൾ പഠിക്കാൻ പോകുന്ന ഈ കോഴ്സിന് നാല് വർഷം കഴിഞ്ഞ് ഞാൻ പുറത്തിറങ്ങുമ്പോൾ വല്ല പ്രസക്തിയുമുണ്ടാകുമോ?", "ഞാൻ വർഷങ്ങളായി സ്വപ്നം കാണുന്ന എൻ്റെ ജോലി ഒരു റോബോട്ട് അല്ലെങ്കിൽ ഒരു എ.ഐ സോഫ്റ്റ്‌വെയർ തട്ടിയെടുക്കുമോ?" എന്നീ ചോദ്യങ്ങളാണ് അവർ ചോദിക്കുന്നത്. ഗൂഗിളും ചാറ്റ്ജിപിടിയും (ChatGPT) ക്ലോഡും (Claude) മിഡ്‌ജേർണിയും (Midjourney) എന്തിന് നമ്മുടെ വാട്സ്ആപ്പിലെ മെറ്റാ എ.ഐ പോലും വിരൽത്തുമ്പിൽ ലോകത്തെ മുഴുവൻ അറിവുകളും സർഗ്ഗാത്മകതയും എത്തിച്ചുനൽകുന്ന കാലത്ത്, മനുഷ്യൻ്റെയും അവൻ്റെ അധ്വാനത്തിൻ്റെയും യഥാർത്ഥ പ്രസക്തി എന്താണ് എന്ന വലിയ ദാർശനിക ചോദ്യമാണ് അവർ അറിയാതെയാണെങ്കിലും ചോദിച്ചുകൊണ്ടിരിക്കുന്നത്.

മാറ്റങ്ങളുടെ വേഗതയും മനുഷ്യൻ്റെ പകപ്പും: ചരിത്രം ആവർത്തിക്കുന്നുവോ?:

മനുഷ്യചരിത്രം എക്കാലത്തും സാങ്കേതികവിദ്യയുടെ വലിയ മാറ്റങ്ങളെ കണ്ടിട്ടുണ്ട്. ഒരു സുപ്രഭാതത്തിൽ ഉണ്ടായതല്ല നാം ഇന്നുകാണുന്ന ഈ സൗകര്യങ്ങളൊന്നും. കാർഷിക വിപ്ലവത്തിൽ നിന്നും വ്യവസായിക വിപ്ലവത്തിലേക്കും, അവിടെ നിന്ന് ഇൻഫർമേഷൻ ടെക്നോളജി വിപ്ലവത്തിലേക്കും മനുഷ്യൻ പടിപടിയായി നടന്നു കയറിയതാണ്. അപ്പോഴൊക്കെയും പഴയ ചില തൊഴിലുകൾ ഇല്ലാതാവുകയും പുതിയ നിരവധിയേറെ തൊഴിലുകൾ സൃഷ്ടിക്കപ്പെടുകയും ചെയ്തിട്ടുണ്ട്.

പാടത്ത് ട്രാക്ടറുകൾ വന്നപ്പോൾ ഉഴവുകാരുടെ ജോലി പോയി, പക്ഷേ അത് നന്നാക്കാൻ മെക്കാനിക്കുകൾ ഉണ്ടായി. ഫാക്ടറികളിൽ വലിയ യന്ത്രങ്ങൾ വന്നപ്പോൾ തൊഴിലാളികളുടെ എണ്ണം കുറഞ്ഞു, പക്ഷേ ആ യന്ത്രങ്ങൾ നിർമ്മിക്കാനും പ്രവർത്തിപ്പിക്കാനും പുതിയ ആളുകൾ വേണ്ടിവന്നു. കമ്പ്യൂട്ടറുകൾ ഓഫീസുകൾ കീഴടക്കിയപ്പോൾ ടൈപ്പ് റൈറ്റർമാരുടെയും കണക്കെഴുത്തുകാരുടെയും ജോലി പോയി, പക്ഷേ അവിടെ ഡാറ്റാ എൻട്രി ഓപ്പറേറ്റർമാരും പ്രോഗ്രാമർമാരും സോഫ്റ്റ്‌വെയർ എഞ്ചിനീയർമാരും ഉണ്ടായി. അതുകൊണ്ട് തന്നെ സാങ്കേതികവിദ്യ ഒരു വില്ലനല്ല എന്ന് നമുക്കറിയാം.

എന്നാൽ നിർമ്മിത ബുദ്ധി (Artificial Intelligence) അഥവാ എ.ഐയുടെ വരവ് ഇതിൽ നിന്നെല്ലാം തികച്ചും വ്യത്യസ്തമാണ്. എന്തുകൊണ്ടാണ് നമ്മൾ എ.ഐയെ ഇത്രത്തോളം ഭയപ്പെടുന്നത്? അതിനൊരു കാരണമുണ്ട്. മുൻപുള്ള യന്ത്രങ്ങളെല്ലാം മനുഷ്യൻ്റെ കായികാധ്വാനത്തെയാണ് (Physical labor) ലഘൂകരിച്ചതെങ്കിൽ, എ.ഐ മനുഷ്യൻ്റെ ബൗദ്ധികാധ്വാനത്തെയാണ് (Cognitive labor) ഏറ്റെടുക്കുന്നത്. ഇതാണ് ഏറ്റവും വലിയ വ്യത്യാസം. ഭാരമുള്ള സാധനങ്ങൾ എടുക്കാൻ ക്രെയ്ൻ വന്നപ്പോൾ നമ്മൾ ഭയപ്പെട്ടില്ല, കാരണം അത് നമ്മുടെ ശരീരത്തിന് പകരമാണ് പ്രവർത്തിക്കുന്നത്. എന്നാൽ നമ്മുടെ തലച്ചോറിന് പകരമായി ചിന്തിക്കാൻ ഒരു യന്ത്രം വരുമ്പോൾ അവിടെ സ്വാഭാവികമായും ഭയം ജനിക്കും.

ഇന്ന് പാട്ട് പാടാനും, മനോഹരമായ കവിതയെഴുതാനും, നമ്മൾ ചിന്തിക്കുന്നതിലും വേഗത്തിൽ ചിത്രങ്ങൾ വരയ്ക്കാനും, സങ്കീർണ്ണമായ കോഡിങ് ചെയ്യാനും, മെഡിക്കൽ റിപ്പോർട്ടുകൾ പരിശോധിച്ച് കൃത്യമായി രോഗം നിർണ്ണയിക്കാനും എ.ഐക്ക് നിഷ്പ്രയാസം സാധിക്കുന്നു. മനുഷ്യൻ്റെ മാത്രം കുത്തകയാണെന്ന് നാം കാലാകാലങ്ങളായി അഹങ്കരിച്ചിരുന്ന സർഗ്ഗാത്മകതയുടെ (Creativity) കോട്ടകളിലേക്കാണ് എ.ഐ യാതൊരു സങ്കോചവുമില്ലാതെ നുഴഞ്ഞുകയറുന്നത്. സൂപ്പർ ഇൻ്റലിജൻസ് (Super Intelligence) അഥവാ നിർമ്മിത സാമാന്യ ബുദ്ധി (AGI - Artificial General Intelligence) എന്ന ആശയം യാഥാർത്ഥ്യമാകുമ്പോൾ, അതായത് മനുഷ്യനേക്കാൾ ബുദ്ധിയുള്ള ഒരു സംവിധാനം വരുമ്പോൾ, അത് മനുഷ്യനെ നിയന്ത്രിക്കുമോ എന്ന ഭയം സ്വാഭാവികമാണ്. ഈയൊരു പശ്ചാത്തലത്തിൽ വേണം ആ പത്താം ക്ലാസുകാരൻ്റെ ചോദ്യത്തെ നാം കൂടുതൽ ഗൗരവത്തോടെ നോക്കിക്കാണാൻ. അവൻ്റെ ഭയം അടിസ്ഥാനരഹിതമല്ല.

വിവരങ്ങളുടെ കുത്തൊഴുക്കും ഗൈഡൻസിൻ്റെ പുതിയ കാല പ്രസക്തിയും:

ഇവിടെയാണ് ഏറ്റവും വലിയ ചോദ്യം ഉയരുന്നത്. എല്ലാം ഇൻ്റർനെറ്റിലും എ.ഐയിലും ലഭ്യമായ ഈ കാലത്ത്, എന്തിനാണ് കരിയർ ഗൈഡുകൾ? എന്തിനാണ് മെൻ്റർമാർ? ഇവിടെയാണ് അറിവിനൊപ്പം നീങ്ങുന്ന 'അലിവിൻ്റെ കൂട്ടമായ' ഗൈഡിങ് പ്രവർത്തകരുടെ യഥാർത്ഥ പ്രസക്തി വെളിപ്പെടുന്നത്.

നമുക്കറിയാം, ഒരു കാലത്ത് കരിയർ ഗൈഡുകൾ എന്നാൽ വെറും വിവരങ്ങൾ നൽകുന്നവർ (Information Providers) മാത്രമായിരുന്നു. ഏത് കോഴ്സ് എവിടെ പഠിക്കണം, എൻട്രൻസ് പരീക്ഷകളുടെ തീയതികൾ എപ്പോൾ, സ്കോളർഷിപ്പുകൾ എവിടെ കിട്ടും, പുതിയ തൊഴിലവസരങ്ങൾ എവിടെയൊക്കെയുണ്ട് തുടങ്ങിയ വിവരങ്ങൾ കുട്ടികൾക്ക് പകർന്നുനൽകുക എന്നതായിരുന്നു അവരുടെ പ്രധാന ദൗത്യം. ആ കാലത്ത് വിവരങ്ങൾ ശേഖരിക്കുക എന്നത് വളരെ ബുദ്ധിമുട്ടുള്ള കാര്യമായിരുന്നു. വലിയ കരിയർ എൻസൈക്ലോപീഡിയകളോ, പത്രങ്ങളിലെ തൊഴിൽ പേജുകളോ, അല്ലെങ്കിൽ മാസികകളോ ഒക്കെയായിരുന്നു ആശ്രയം. അതിനാൽ ആ വിവരങ്ങൾ മനപാഠമാക്കിയിട്ടുള്ള ഒരാൾക്ക് വലിയ വിലയുണ്ടായിരുന്നു.

എന്നാൽ ഇന്ന് കാര്യങ്ങൾ അങ്ങനെയല്ല. ആ വിവരങ്ങളെല്ലാം നിമിഷനേരം കൊണ്ട് എ.ഐ നൽകും. ഒരു വിദ്യാർത്ഥിക്ക് തൻ്റെ മാർക്കും താല്പര്യങ്ങളും ഇഷ്ടങ്ങളും തൻ്റെ സാമ്പത്തിക ചുറ്റുപാടും ഒരു പ്രോംപ്റ്റായി (Prompt) ചാറ്റ്ജിപിടിക്കോ മറ്റ് എ.ഐ ടൂളുകൾക്കോ നൽകിയാൽ, ലോകത്തെ ഏറ്റവും മികച്ചതും അവന് അനുയോജ്യവുമായ കരിയർ ഓപ്ഷനുകൾ അത് കൃത്യമായി സ്ക്രീനിൽ കാണിച്ചുതരും. അതും പല ഓപ്ഷനുകളായി, അതിൻ്റെ ഫീസും, പഠിക്കേണ്ട രീതികളും സഹിതം.

അപ്പോൾ പിന്നെ ഒരു കരിയർ ഗൈഡിൻ്റെ ആവശ്യമുണ്ടോ? ഈ യന്ത്രങ്ങൾ കരിയർ കൗൺസിലർമാരെ മാറ്റിസ്ഥാപിക്കുമോ?

തീർച്ചയായും ഇല്ല!

സത്യം പറയട്ടെ,

മനുഷ്യനായ ഒരു ഗൈഡിൻ്റെ ആവശ്യം മുമ്പത്തേക്കാൾ നൂറിരട്ടി കൂടുതലാണ് ഇന്ന്. കാരണം, ഇന്നത്തെ കാലത്തെ വിദ്യാർത്ഥികൾ നേരിടുന്ന പ്രധാന പ്രശ്നം വിവരങ്ങളുടെ അഭാവമല്ല, മറിച്ച് വിവരങ്ങളുടെ അതിപ്രസരമാണ് (Information Overload). ഈ ഡാറ്റകളുടെ കുത്തൊഴുക്കിൽ നിന്ന് തനിക്ക് അനുയോജ്യമായത് ഏതാണെന്ന് തിരഞ്ഞെടുക്കാൻ, അതൊന്ന് ഫിൽറ്റർ ചെയ്യാൻ വിദ്യാർത്ഥികൾക്ക് കഴിയുന്നില്ല. കൺഫ്യൂഷനാണ് ഇന്നത്തെ കുട്ടികളുടെ പ്രധാന പ്രശ്നം.

അവിടെയാണ് ഒരു മനുഷ്യൻ്റെ സഹായം ആവശ്യമായി വരുന്നത്. വിവരങ്ങൾ നൽകാൻ ഒരു അൽഗോരിതത്തിന് കഴിഞ്ഞേക്കാം. എന്നാൽ ആ അറിവുകളെ വിദ്യാർത്ഥിയുടെ യഥാർത്ഥ അഭിരുചിയോടും, അവൻ്റെ ഉള്ളിലെ സ്വപ്നങ്ങളോടും, അവൻ്റെ സാമ്പത്തിക ചുറ്റുപാടിനോടും, കുടുംബ പശ്ചാത്തലത്തോടും, ഏറ്റവും ഉപരിയായി അവൻ്റെ അന്നത്തെ മാനസികാവസ്ഥയോടും ചേർത്തുവെക്കാൻ ഒരു മനുഷ്യനേ കഴിയൂ. ഡാറ്റകളെ വികാരങ്ങളുമായി കോർത്തിണക്കാൻ എ.ഐക്ക് ഇന്നുവരെ കഴിഞ്ഞിട്ടില്ല, ഭാവിയിൽ അതിന് കഴിയുമോ എന്നതും സംശയമാണ്. ഒരു കുട്ടി പറയുന്ന കാര്യങ്ങൾ കേൾക്കാൻ എ.ഐക്ക് കഴിയും, എന്നാൽ അവൻ പറയാതെ വിടുന്ന കാര്യങ്ങൾ, അവൻ്റെ കണ്ണുകളിലെ ഭയം, ശരീരഭാഷയിലെ ആശങ്ക... ഇതൊക്കെ വായിച്ചെടുക്കാൻ പരിശീലനം ലഭിച്ച ഒരു മനുഷ്യനേ കഴിയൂ.

കരിയർ ഗൈഡ്: വെറുമൊരു വഴികാട്ടിയല്ല, ബൂസ്റ്റർ റോക്കട്ടാണ്:

ഒരു കരിയർ ഗൈഡ് വെറുമൊരു വിവരദായകൻ (Information desk) അല്ലാതാവുന്നത് ഇവിടെയാണ്. കാലത്തിനനുസരിച്ച് കുതിക്കാൻ വിദ്യാർത്ഥിക്ക് പ്രേരണ നൽകുന്ന ഒരു 'ബൂസ്റ്റർ റോക്കറ്റായി' അയാൾ മാറുന്നു. എന്താണ് ഒരു ബൂസ്റ്റർ റോക്കറ്റ്? ഒരു വലിയ റോക്കറ്റ് ബഹിരാകാശത്തേക്ക് കുതിക്കുമ്പോൾ, അതിനെ ഭൂഗുരുത്വാകർഷണ വലയത്തിൽ നിന്ന് പുറത്തുകടക്കാൻ സഹായിക്കുന്നത് അതിൻ്റെ ഇരുവശങ്ങളിലും ഘടിപ്പിച്ചിരിക്കുന്ന അതിശക്തമായ ബൂസ്റ്റർ റോക്കറ്റുകളാണ്. തങ്ങളുടെ ഉള്ളിലെ ഇന്ധനം മുഴുവൻ കത്തിച്ചുതീർത്ത്, ആ പ്രധാന പേടകത്തിന് ആവശ്യത്തിന് വേഗതയും ഊർജ്ജവും നൽകിക്കഴിഞ്ഞാൽ ആ ബൂസ്റ്ററുകൾ തനിയെ അടർന്നുമാറും. പിന്നീട് ആ പേടകം സ്വന്തം പാതയിലൂടെ തനിയെ സഞ്ചരിക്കും.

വളരെ മനോഹരവും സമാനവുമായ ഒരു റോളാണ് ഇന്നത്തെ കാലത്ത് ഒരു കരിയർ മെൻ്റർക്ക് ചെയ്യാനുള്ളത്. വിദ്യാർത്ഥികൾ പലപ്പോഴും സംശയങ്ങളുടെയും, അപകർഷതാബോധത്തിൻ്റെയും, സുഹൃത്തുക്കളുടെ ഇടയിലെ സമ്മർദ്ദങ്ങളുടെയും (Peer pressure) ഭൂഗുരുത്വാകർഷണത്തിൽ കുടുങ്ങിക്കിടക്കുകയാവും. ചിലപ്പോൾ രക്ഷിതാക്കളുടെ അമിത പ്രതീക്ഷകളാവാം അവരെ താഴോട്ട് വലിക്കുന്നത്. തനിക്ക് എന്തിനെങ്കിലും കഴിവുണ്ടോ എന്ന് സ്വയം സംശയിക്കുന്നവരാണ് ഭൂരിഭാഗം കൗമാരക്കാരും.

അവിടെ അവർക്ക് സ്വന്തം കഴിവുകളെ തിരിച്ചറിയാനും, ലക്ഷ്യത്തിലേക്ക് കുതിക്കാനുമുള്ള വലിയ ഊർജ്ജം നൽക എന്നതാണ് ഗൈഡിൻ്റെ ജോലി. യന്ത്രങ്ങൾക്ക് ഒരിക്കലും സാധിക്കാത്ത മാനുഷിക മൂല്യങ്ങൾ പകർന്നു നൽക എന്നതാണ് ഈ ബൂസ്റ്റർ റോക്കറ്റിൻ്റെ ഇന്ധനം. നമുക്കൊരു ഉദാഹരണം നോക്കാം. ഒരു വിദ്യാർത്ഥി പരീക്ഷയിൽ പരാജയപ്പെട്ട്, ഇനി എന്ത് ചെയ്യണമെന്നറിയാതെ, ലോകം അവസാനിച്ചു എന്ന് കരുതി പകച്ചുനിൽക്കുന്നു. ആ നിമിഷത്തിൽ അവൻ്റെ തോളിൽ ഒരു കൈവെച്ച്, അവൻ്റെ കണ്ണുകളിൽ നോക്കി "നിനക്കിത് കഴിയും, ഒരു തോൽവി എല്ലാറ്റിൻ്റെയും അവസാനമല്ല, നിൻ്റെ വഴി ഇതല്ല മറ്റൊന്നാണ്, നമുക്ക് ഒന്നു കൂടി പുതിയതായി ശ്രമിച്ചു നോക്കാം" എന്ന് കരുതലോടെ പറയാൻ ലോകത്തെ ഏറ്റവും മികച്ച സൂപ്പർ കമ്പ്യൂട്ടറിനും കഴിയില്ല. ആ സ്പർശത്തിന്, ആ ആശ്വാസവാക്കുകൾക്ക് ഒരു എ.ഐക്കും പകരമാവാനാവില്ല. ഒരു മനുഷ്യൻ്റെ സാന്ത്വനം മനുഷ്യന് മാത്രമേ നൽകാനാവൂ.

ഒരു ചെറിയ ഉദാഹരണം: അലൻ്റെയും അവൻ്റെ മെൻ്ററുടെയും കഥ:

ഈ വിഷയം കൂടുതൽ വ്യക്തമാകാൻ നമുക്കൊരു കഥ നോക്കാം, എന്നാൽ ഇത് ഇന്ന് പല വീടുകളിലും നടക്കുന്ന യഥാർത്ഥ സംഭവമാണ്. അലൻ പ്ലസ് ടു സയൻസ് വിദ്യാർത്ഥിയാണ്. അവന് ചെറുപ്പത്തിലേ കോഡിങ് ഭയങ്കര ഇഷ്ടമാണ്. ഒരു മികച്ച സോഫ്റ്റ്‌വെയർ എഞ്ചിനീയർ ആകണം എന്നതായിരുന്നു അവൻ്റെ സ്വപ്നം. എന്നാൽ അടുത്തിടെ 'ഡെവിൻ' (Devin) പോലെയുള്ള എ.ഐ സോഫ്റ്റ്‌വെയർ എഞ്ചിനീയർമാരുടെ വാർത്തകൾ അവൻ കാണുന്നു. മനുഷ്യർ ദിവസങ്ങൾ എടുത്ത് എഴുതുന്ന കോഡുകൾ ഈ എ.ഐ നിമിഷങ്ങൾ കൊണ്ട് എഴുതുന്നു, തെറ്റുകൾ തിരുത്തുന്നു. ഇത് കണ്ട അലൻ ആകെ നിരാശനായി. "ഇനി ഞാൻ എന്തിനാണ് കോഡിങ് പഠിക്കുന്നത്? നാല് വർഷം കഴിഞ്ഞ് ഞാൻ പഠിച്ചിറങ്ങുമ്പോൾ എൻ്റെ ജോലി ഈ എ.ഐ ചെയ്യില്ലേ?" ഇതായിരുന്നു അവൻ്റെ ചോദ്യം. അവൻ പഠനം തന്നെ ഉഴപ്പാൻ തുടങ്ങി.

അവനെ ഒരു എ.ഐ കൗൺസിലിംഗ് ചാറ്റ്ബോട്ടിന് മുന്നിലിരുത്തിയാൽ എന്ത് സംഭവിക്കും?

അത് കോഡിങ്ങിന് പകരം മറ്റ് കോഴ്സുകളുടെ ഒരു നീണ്ട ലിസ്റ്റ് കൊടുക്കും.

പക്ഷേ അലൻ്റെ പ്രശ്നം അതായിരുന്നില്ല.

ഇവിടെയാണ് ഒരു യഥാർത്ഥ മെൻ്ററുടെ ഇടപെടൽ നടക്കുന്നത്. ആ മെൻ്റർ അലനോട് സംസാരിച്ചു.

എ.ഐക്ക് കോഡ് ചെയ്യാൻ അറിയാമെങ്കിലും, എന്ത് കോഡ് ചെയ്യണം, എന്തിന് കോഡ് ചെയ്യണം എന്ന് തീരുമാനിക്കുന്നത് മനുഷ്യനാണെന്ന് അവന് മനസ്സിലാക്കിക്കൊടുത്തു. എ.ഐ എന്നത് ഒരു ടൂൾ ആണെന്നും, കോഡിങ് പഠിക്കുന്നതിനൊപ്പം സിസ്റ്റം ഡിസൈൻ, ക്രിയേറ്റീവ് പ്രോബ്ലം സോൾവിങ് എന്നിവ കൂടി പഠിച്ചാൽ അലന് എ.ഐയെ നിയന്ത്രിക്കുന്ന ഒരു പ്രൊജക്റ്റ് മാനേജർ ആകാമെന്ന് മെൻ്റർ കാണിച്ചുകൊടുത്തു. അവൻ്റെ നഷ്ടപ്പെട്ട ആത്മവിശ്വാസം തിരിച്ചുകിട്ടി. ഇതൊരിക്കലും ഒരു യന്ത്രത്തിന് ചെയ്യാൻ കഴിയുന്ന കാര്യമല്ല.

ഇമോഷണൽ ഇൻ്റലിജൻസ്: യന്ത്രങ്ങളെ തോൽപ്പിക്കുന്ന മനുഷ്യൻ്റെ ആയുധം:

നിർമ്മിത ബുദ്ധിക്ക് (Artificial Intelligence) ഇല്ലാത്തതും, എന്നാൽ മനുഷ്യന് ജന്മനാ ഉള്ളതുമായ ആ വലിയ കഴിവാണ് വൈകാരിക ബുദ്ധി അഥവാ ഇമോഷണൽ ഇൻ്റലിജൻസ് (Emotional Intelligence). എ.ഐ കാലത്തെ അതിജീവിക്കാൻ കുട്ടികളെ പ്രാപ്തരാക്കേണ്ടത് യന്ത്രങ്ങളെപ്പോലെ വേഗത്തിൽ കണക്കുകൂട്ടാനോ, പീരിയോഡിക് ടേബിൾ മുഴുവൻ കാണാപാഠം പഠിക്കാനോ അല്ല. കാരണം അക്കാര്യത്തിൽ നാം എത്ര കഷ്ടപ്പെട്ടാലും ഒരു ചെറിയ സ്മാർട്ട്ഫോണിനെപ്പോലും തോൽപ്പിക്കാൻ കഴിയില്ല. അവർ നമ്മെക്കാൾ വേഗത്തിൽ ചിന്തിക്കും, മടുപ്പില്ലാതെ ജോലി ചെയ്യും, അനന്തമായ കാര്യങ്ങൾ ഓർമ്മിച്ചുവെക്കും.

മറിച്ച്, നാം കുട്ടികളെ പഠിപ്പിക്കേണ്ടത് യന്ത്രങ്ങൾക്ക് ഒരിക്കലും സാധിക്കാത്ത കാര്യങ്ങളാണ്. എന്തൊക്കെയാണവ?

സർഗ്ഗാത്മകത (Creativity): പുതിയ ആശയങ്ങൾ കണ്ടെത്താനുള്ള കഴിവ്. നിലവിലുള്ള ഡാറ്റ വെച്ച് കോപ്പി അടിക്കാൻ എ.ഐക്ക് കഴിയും, എന്നാൽ തികച്ചും പുതിയതൊന്ന് സൃഷ്ടിക്കാൻ മനുഷ്യൻ്റെ വട്ടുകൾ (Crazy ideas) കൂടിയേ തീരൂ.

സഹാനുഭൂതി (Empathy): മറ്റൊരാളുടെ വിഷമം തൻ്റേത് പോലെ കണ്ട് മനസ്സിലാക്കാനുള്ള കഴിവ്.

വിമർശനാത്മക ചിന്ത (Critical Thinking): ഒരു കാര്യം ശരിയോ തെറ്റോ എന്ന് സ്വയം ചിന്തിച്ച് വിശകലനം ചെയ്യാനുള്ള കഴിവ്.

സങ്കീർണ്ണമായ പ്രശ്നപരിഹാര ശേഷി (Complex Problem Solving): മനുഷ്യരുടെ ഇടയിലുള്ള പ്രശ്നങ്ങൾ പലതും ലോജിക് വെച്ച് മാത്രം തീർക്കാൻ കഴിയില്ല, അവിടെ വൈകാരികമായ ഇടപെടൽ വേണം.

ആശയവിനിമയ പാടവം (Communication Skills) & കൂട്ടായ്മ (Teamwork): മറ്റുള്ളവരുമായി ചേർന്ന്, അവരെ മനസ്സിലാക്കി ജോലി ചെയ്യാനുള്ള കഴിവ്.

ഒരു ഉദാഹരണം നോക്കാം:

ഒരു മികച്ച കമ്പ്യൂട്ടർ കോഡ് എഴുതാൻ ഭാവിയിൽ എ.ഐക്ക് നിഷ്പ്രയാസം കഴിയും, എന്നാൽ ആ കോഡ് ഉപയോഗിച്ച് സമൂഹത്തിലെ ഒരു പാവപ്പെട്ട കർഷകൻ്റെ പ്രശ്നം എങ്ങനെ പരിഹരിക്കാം എന്ന് ചിന്തിക്കാൻ മനുഷ്യനേ കഴിയൂ. മെഡിക്കൽ സയൻസിൽ, ആയിരക്കണക്കിന് എക്സ്-റേകളും എം.ആർ.ഐ സ്കാൻ റിപ്പോർട്ടുകളും സെക്കൻ്റുകൾക്കുള്ളിൽ പരിശോധിച്ച് കൃത്യമായി രോഗനിർണ്ണയം നടത്താൻ എ.ഐക്ക് കഴിയും. എന്നാൽ, ക്യാൻസർ പോലൊരു വലിയ രോഗവിവരം അറിഞ്ഞ് മാനസികമായി തകർന്ന്, ഭയന്നിരിക്കുന്ന ഒരു രോഗിയുടെ കൈപിടിച്ച്, അയാളുടെ കുടുംബത്തിന് ആശ്വാസവാക്കുകൾ നൽകി, ചികിത്സയുടെ വലിയ പ്രതീക്ഷകൾ നൽകാൻ ഒരു മനുഷ്യനായ ഡോക്ടർക്ക് മാത്രമേ കഴിയൂ. ഈ മാനുഷികമായ സ്പർശം ആവശ്യമുള്ള മേഖലകളിലേക്കാണ് ഇനി കുട്ടികൾ തിരിയേണ്ടത്.

അവരെ നയിക്കേണ്ടതും ആ ദിശയിലേക്കാണ്.

രക്ഷിതാക്കൾ അറിയാൻ: മാർക്കുകളല്ല, മനുഷ്യത്വമാണ് വലുത്:

ഈ വലിയ മാറ്റത്തിൽ കുട്ടികൾക്ക് മാത്രം പോരാ, അവരെ നയിക്കുന്ന രക്ഷിതാക്കളും ഈ എ.ഐ കാലത്ത് അടിമുടി മാറേണ്ടതുണ്ട്. തൻ്റെ കുട്ടി എൻജിനീയറോ ഡോക്ടറോ മാത്രമേ ആകാവൂ എന്ന പരമ്പരാഗത വാശി ഇനിയെങ്കിലും ഉപേക്ഷിക്കാൻ അവർ തയ്യാറാകണം. എ.ഐയുടെ വരവോടെ ഏറ്റവും വലിയ മാറ്റങ്ങൾ സംഭവിക്കാൻ പോകുന്നത് ഐ.ടി, ലോജിസ്റ്റിക്സ്, ഡാറ്റാ എൻട്രി, അക്കൗണ്ടിംഗ് തുടങ്ങിയ പരമ്പരാഗത മേഖലകളിലാണ്.

പകരം, പുതിയ ലോകത്ത് എ.ഐ എത്തിക്സ് (AI Ethics), പ്രോംപ്റ്റ് എഞ്ചിനീയറിംഗ് (Prompt Engineering), ഹ്യൂമൻ-മെഷീൻ ഇൻ്ററാക്ഷൻ (Human-Machine Interaction), മെൻ്റൽ ഹെൽത്ത് കൗൺസിലിംഗ്, എൻവയോൺമെൻ്റൽ സയൻസ്, സൈബർ സെക്യൂരിറ്റി, പേഴ്സണൽ കെയർ തുടങ്ങിയ പുത്തൻ മേഖലകളിൽ വലിയ അവസരങ്ങളാണ് വരാൻ പോകുന്നത്. തങ്ങളുടെ കുട്ടിയുടെ യഥാർത്ഥ താല്പര്യങ്ങൾക്കനുസരിച്ച് അവരെ പറക്കാൻ അനുവദിക്കുക എന്നതാണ് രക്ഷിതാക്കൾക്ക് ചെയ്യാനുള്ളത്. എൻട്രൻസ് കോച്ചിംഗ് സെൻ്ററുകളിലേക്ക് അവരെ തള്ളിയിടുന്നതിന് പകരം, പ്രകൃതിയെ അറിയാനും, മനുഷ്യരുമായി ഇടപെടാനും, കലകൾ ആസ്വദിക്കാനും അവർക്ക് അവസരം നൽകണം. ഇവിടെയും കരിയർ ഗൈഡുകൾക്ക് രക്ഷിതാക്കളെ ബോധവൽക്കരിക്കുക എന്ന അതിപ്രധാനമായ ദൗത്യമുണ്ട്.

സ്വയം അറിഞ്ഞ വഴികാട്ടി: മെൻ്റർമാരുടെ അപ്ഡേഷൻ:

സ്വന്തത്തെ തിരിച്ചറിഞ്ഞ ഒരു കരിയർ ഗൈഡിന് മാത്രമേ വിദ്യാർത്ഥിയെയും രക്ഷിതാവിനെയും ഇത്തരത്തിൽ ആഴത്തിൽ ഗൈഡ് ചെയ്യാൻ കഴിയൂ. തൻ്റെ മുന്നിലിരിക്കുന്ന വിദ്യാർത്ഥിയുടെ സ്വപ്നങ്ങളെയും ഭയങ്ങളെയും കാണാൻ കഴിയണമെങ്കിൽ, ഗൈഡ് ആദ്യം തൻ്റെ തന്നെ പരിമിതികളെയും കഴിവുകളെയും തിരിച്ചറിയണം. മാറ്റങ്ങളെ ഭയക്കുന്ന, പുതിയ കാര്യങ്ങൾ പഠിക്കാൻ മടിക്കുന്ന ഒരാൾക്ക് എങ്ങനെയാണ് മാറ്റങ്ങളെ ഉൾക്കൊള്ളാൻ കുട്ടികളെ പ്രാപ്തരാക്കാനാവുക?

എ.ഐയെ ഒരു ശത്രുവായി കാണാതെ, അതിനെ തൻ്റെ പ്രവർത്തനങ്ങളെ കൂടുതൽ മിനുസപ്പെടുത്താനുള്ള ഒരു ആയുധമായി (Tool) മാറ്റാൻ മെൻ്റർമാർ പഠിക്കണം. പുതിയ കാലത്തെ സാങ്കേതികവിദ്യകളെക്കുറിച്ച് അവർ ബോധവാന്മാരായിരിക്കണം. മികച്ച രീതിയിൽ ചോദ്യങ്ങൾ ചോദിക്കാൻ എ.ഐയെ പഠിപ്പിക്കുന്ന പ്രോംപ്റ്റ് എഞ്ചിനീയറിങ്ങും, കുട്ടികളുടെ അഭിരുചി പരീക്ഷകളുടെ (Aptitude test) ഫലങ്ങൾ കൃത്യമായി വിശകലനം ചെയ്യാനുള്ള ഡാറ്റാ അനലിറ്റിക്സും മനസ്സിലാക്കി, സ്വന്തം സ്കില്ലുകൾ നിരന്തരം അപ്ഡേറ്റ് ചെയ്യുന്ന ഒരു ഗൈഡിന് മുന്നിൽ ഏത് പ്രതിസന്ധിയും വലിയൊരു സാധ്യതയായി മാറും.

ഒരു വിദ്യാർത്ഥിയുടെ അഭിരുചികൾ അനലൈസ് ചെയ്യാൻ നിങ്ങൾക്ക് എ.ഐ ടൂളുകൾ ഉപയോഗിക്കാം, അത് നിങ്ങളുടെ സമയം ലാഭിക്കും. എന്നാൽ അതിൻ്റെ ഫലം വിദ്യാർത്ഥിക്ക് പറഞ്ഞുകൊടുക്കുമ്പോൾ തൻ്റേതായ സ്നേഹവും കരുതലും മുൻകാല അനുഭവങ്ങളും ഉപദേശങ്ങളും ചേർക്കുകയും ചെയ്യുമ്പോഴാണ് ഗൈഡൻസ് പൂർണ്ണമാകുന്നത്. നാം മാറുമ്പോഴാണ് നമ്മളിലൂടെ സമൂഹവും കുട്ടികളും മാറുന്നത്. പഴയ സിലബസും വെച്ച് പുതിയ കാലത്തെ നേരിടാനാവില്ല എന്ന് ഗൈഡുകൾ തിരിച്ചറിയണം.

അതിജീവനത്തിൻ്റെ മന്ത്രം: നിരന്തര പഠനവും പൊരുത്തപ്പെടലും (Adaptability):

ആ പത്താം ക്ലാസുകാരൻ്റെ ചോദ്യത്തിലേക്ക് തന്നെ നമുക്ക് അവസാനമായി തിരിച്ചുവരാം.

എന്താണ് അവന് ഞാൻ നൽകിയ മറുപടി?

അവനോട്, അവനെപ്പോലുള്ള ലക്ഷക്കണക്കിന് കുട്ടികളോട്, നമുക്ക് നൽകാനുള്ള ഉത്തരം ഇതാണ്

എ.ഐ ഒരിക്കലും മനുഷ്യനെ കീഴടക്കാൻ പോകുന്നില്ല. മനുഷ്യൻ്റെ അതിരില്ലാത്ത സർഗ്ഗാത്മകതയെയും ആഴത്തിലുള്ള വൈകാരികതയെയും പൂർണ്ണമായി പകർപ്പെടുത്താൻ ഒരു അൽഗോരിതത്തിനും ഇന്നുവരെ കഴിഞ്ഞിട്ടില്ല, ഇനിയൊട്ട് കഴിയുകയുമില്ല.

പക്ഷേ, ചരിത്രവും പുതിയ കാലവും നമ്മെ പഠിപ്പിക്കുന്ന ഒരു വലിയ യാഥാർത്ഥ്യമുണ്ട്. വളരെ ശ്രദ്ധിച്ച് മനസ്സിലാക്കേണ്ട ഒന്നാണത്. 'എ.ഐ ഒരിക്കലും ഒരു മനുഷ്യൻ്റെ ജോലി തട്ടിയെടുക്കില്ല, എന്നാൽ എ.ഐ ഉപയോഗിക്കാൻ അറിയുന്ന ഒരു മനുഷ്യൻ, എ.ഐ ഉപയോഗിക്കാൻ അറിയാത്ത മറ്റൊരു മനുഷ്യൻ്റെ ജോലി തീർച്ചയായും തട്ടിയെടുക്കും'.

അതുകൊണ്ട് വേണ്ടത് ഭയമല്ല, ഒളിച്ചോട്ടവുമല്ല. പുതിയതിനെ പഠിക്കാനുള്ള സന്നദ്ധതയാണ് (Willingness to learn). സാങ്കേതികവിദ്യയെ അതിൻ്റെ പൂർണ്ണതയിൽ ഉപയോഗിക്കാൻ പഠിക്കുക. പുതിയ കാലത്തിന് ആവശ്യമുള്ള സ്കില്ലുകൾ പഠിച്ചെടുത്ത് (Upskilling & Reskilling), തൻ്റേതായ അഭിരുചികളെ നിരന്തരം രാകിമിനുക്കിയെടുത്താൽ ഈ എ.ഐ കാലം ഒരു ഭീഷണിയല്ല, മറിച്ച് മനുഷ്യ ചരിത്രത്തിലെ ഏറ്റവും വലിയതും മികച്ചതുമായ അവസരമാണ്.

എ.ഐ എന്നത് നിങ്ങൾക്ക് എതിരായ ഒരു വില്ലനല്ല, മറിച്ച് നിങ്ങളുടെ ഒരു മികച്ച അസിസ്റ്റൻ്റാണ്. നിങ്ങൾക്ക് വേണ്ടി വലിയ ഡാറ്റകൾ തരംതിരിക്കാനും, മെയിലുകൾ അയക്കാനും, സങ്കീർണ്ണമായ വിഷയങ്ങൾ വളരെ ലളിതമായി മനസ്സിലാക്കിത്തരാനും കഴിയുന്ന വളരെ വിശ്വസ്തനായ ഒരു ഡിജിറ്റൽ സുഹൃത്ത്. ആ സുഹൃത്തിനെ എങ്ങനെ ഉപയോഗിക്കണം എന്ന് തീരുമാനിക്കേണ്ടത് നിങ്ങളാണ്. ആ ഡ്രൈവിംഗ് സീറ്റിൽ നിങ്ങളിരിക്കുന്ന കാലത്തോളം ഒന്നിനെയും ഭയപ്പെടേണ്ടതില്ല. സ്റ്റിയറിംഗ് നമ്മുടെ കയ്യിൽ തന്നെയായിരിക്കണം.

ഒപ്പം, മനുഷ്യത്വത്തെയും മാനുഷിക ബന്ധങ്ങളെയും മുറുകെ പിടിക്കുക. കാരണം ലോകം എത്ര ഡിജിറ്റലായാലും, മനുഷ്യൻ്റെ അടിസ്ഥാനപരമായ വൈകാരിക ആവശ്യങ്ങൾക്ക്, സ്നേഹത്തിന്, കൂട്ടിന് ഒരു മാറ്റവും സംഭവിക്കില്ല.

അറിവും അലിവും ചേരുന്ന പുതിയ ലോകം:

ഈയൊരു വലിയ തിരിച്ചറിവിലേക്ക് കുട്ടികളെ കൈപിടിച്ചു നടത്തുന്നവരാണ് യഥാർത്ഥ ഗൈഡുകൾ. വിവരങ്ങൾ മാത്രം നൽകുന്ന വെറുമൊരു സെർച്ച് എഞ്ചിനുകൾക്കും ചാറ്റ്ബോട്ടുകൾക്കും ഒരുപാട് മുകളിലാണ് അവരുടെ സ്ഥാനം. കാരണം ഒരു ഗൈഡ് നൽകുന്നത് വെറും വാക്കുകളല്ല, ജീവിതാനുഭവങ്ങളാണ്; ചേർത്തുപിടിക്കലാണ്; പകച്ചുനിൽക്കുമ്പോൾ നൽകുന്ന വലിയ ആത്മവിശ്വാസമാണ്.

വിദ്യാർത്ഥികൾക്ക് മുന്നിൽ ശരിയായ ദിശ കാണിക്കുന്ന വഴികാട്ടിയായും, അവർ പരാജയങ്ങളിൽ വീഴുമ്പോൾ ചേർത്തുപിടിക്കുന്ന താങ്ങായും, അവർ സ്വന്തം ചിറകുകളിൽ പറക്കാൻ തുടങ്ങുമ്പോൾ അതിരുകളില്ലാത്ത ആകാശത്തേക്ക് കുതിക്കാൻ ഊർജ്ജം നൽകുന്ന ബൂസ്റ്റർ റോക്കറ്റായും ഈ സമൂഹത്തിന്, നമുക്ക് ഓരോരുത്തർക്കും മാറാം. സ്വന്തം സ്വത്വത്തെ തിരിച്ചറിഞ്ഞ്, സാങ്കേതികവിദ്യയുടെ വലിയ മാറ്റങ്ങളെ ഉൾക്കൊണ്ട്, അറിവും (Knowledge) അലിവും (Empathy) ഒത്തുചേരുന്ന ഒരു വലിയ കൂട്ടമായി ഗൈഡിങ് പ്രവർത്തകരും സമൂഹവും മാറുമ്പോൾ, അവിടെ ആ പത്താം ക്ലാസുകാരൻ്റെ മാത്രമല്ല, വരാനിരിക്കുന്ന ഒരു തലമുറയുടെ മുഴുവൻ ഭയവും വലിയ ആത്മവിശ്വാസത്തിന് വഴിമാറും.

കാരണം, നാളെ എത്ര വലിയ സൂപ്പർ ഇൻ്റലിജൻസ് വന്നാലും, മനുഷ്യൻ എത്ര വലിയ ആർട്ടിഫിഷ്യൽ ജനറൽ ഇൻ്റലിജൻസ് (AGI) വികസിപ്പിച്ചാലും, സ്നേഹവും അലിവും നിറഞ്ഞ ഒരു മനുഷ്യസ്പർശത്തിന് പകരം വെക്കാൻ ഈ ഭൂമുഖത്ത് മറ്റൊന്നിനുമാവില്ല. അതാണ് മനുഷ്യൻ്റെ എക്കാലത്തെയും കരുത്ത്, അത് തന്നെയാണ് നമ്മുടെ വരുംകാല അതിജീവനവും.

Article By: Mujeebulla K.M
CIGI Career Team

View Details View Details

Blogs

രണ്ടായിരം വർഷം മുൻപ് എഴുതപ്പെട്ട ഒരു കോർപ്പറേറ്റ് - ലൈഫ് മാനുവൽ!

Comments (0)

Write a Comment