ഓണപ്പരീക്ഷയെ നേരിടാൻ ഒരുങ്ങുന്ന കേരളത്തിന്റെ പ്രിയപ്പെട്ട മക്കൾക്കും രക്ഷിതാക്കൾക്കും ചില സ്നേഹമുള്ള ഓർമ്മപ്പെടുത്തലുകൾ
നമ്മുടെ രാജ്യം അതിന്റെ അഭിമാനകരമായ മറ്റൊരു സ്വാതന്ത്ര്യദിനം കൂടി ആഘോഷിക്കാൻ പോവുകയാണ്. സ്കൂളുകളിൽ ത്രിവർണ്ണ പതാക പാറിപ്പറക്കുന്നതും, ദേശഭക്തി ഗാനങ്ങളും, പായസ വിതരണവുമൊക്കെയായി കുട്ടികൾ വലിയൊരു ആവേശത്തിലായിരിക്കും ഇപ്പോൾ. എന്നാൽ ആ സ്വാതന്ത്ര്യദിനത്തിന്റെ ആഘോഷങ്ങളും ആരവങ്ങളും കഴിഞ്ഞാൽപ്പിന്നെ നമ്മുടെ കുട്ടികൾ നേരെ ചെന്നു വീഴുന്നത് വലിയൊരു പരീക്ഷാച്ചൂടിലേക്കാണ്. അതെ, ഈ അധ്യയന വർഷത്തിലെ ആദ്യത്തെ വലിയ കടമ്പയായ 'ക്വാർട്ടേർലി എക്സാം' അഥവാ പാദവാർഷിക പരീക്ഷയെ അഭിമുഖീകരിക്കാൻ ഒരുങ്ങുകയാണ് നമ്മുടെ മക്കൾ.
മഴ കൊണ്ടുപോയ അധ്യയന ദിനങ്ങളും സിലബസ്സ് തീർക്കാനുള്ള തത്രപ്പാടും:
ഈ വർഷത്തെ സ്കൂൾ തുറപ്പും അതിനു പിന്നാലെ വന്ന മാസങ്ങളും കേരളത്തിലെ കുട്ടികൾക്ക് സമ്മാനിച്ചത് തോരാമഴകളുടെ ദിനങ്ങളായിരുന്നു. കലക്ടർമാർ പ്രഖ്യാപിച്ച അവധികൾ കേട്ട് പുതപ്പച്ചു മൂടി ഉറങ്ങിയതിന്റെയും, മഴയത്ത് കളിച്ചു നടന്നതിന്റെയുമൊക്കെ സന്തോഷം കുട്ടികൾക്കുണ്ടെങ്കിലും, ഇപ്പോൾ അതിന്റെയൊരു ചെറിയ ആശങ്ക അവരെ പിടികൂടിയിട്ടുണ്ട്.
തുടർച്ചയായി കിട്ടിയ മഴ അവധികൾ കാരണം പല സ്കൂളുകളിലും പാഠഭാഗങ്ങൾ വേണ്ടവിധം തീർന്നു കിട്ടിയിട്ടുണ്ടാവില്ല. എന്നാലും കലണ്ടറിലെ തീയതികൾ ആർക്കും വേണ്ടിയും കാത്തുനിൽക്കില്ലല്ലോ! സമയമായപ്പോൾ കൃത്യമായി പരീക്ഷയും വന്നെത്തി. പഠിപ്പിച്ചു തീർക്കാനുള്ള നെട്ടോട്ടത്തിൽ അധ്യാപകരും, അതൊക്കെ എങ്ങനെ തലയിൽ കയറ്റും എന്നാലോചിച്ച് നമ്മുടെ 'ന്യൂജെൻ' മക്കളും ചെറിയൊരു ടെൻഷനിലാണ്. ഇനി ഈ പരീക്ഷയെ എങ്ങനെ കടന്നുകൂടും എന്ന ആശങ്ക പല കുട്ടികളുടെയും മുഖത്തുണ്ട്.
പരീക്ഷയൊന്നും ഒരു വലിയ ഭൂതങ്ങളല്ല മക്കളേ!:
പ്രിയപ്പെട്ട കുട്ടികളോട് പറയാനുള്ളത് ഇതാണ്: പരീക്ഷകൾ എന്ന് പറയുന്നത് നിങ്ങളെ ദ്രോഹിക്കാനുള്ള പരീക്ഷണങ്ങളൊന്നുമല്ല.
അതൊരു സ്വാഭാവികമായ പ്രക്രിയ മാത്രമാണ്. ഈ കുറഞ്ഞ സമയത്തിനുള്ളിൽ ക്ലാസ്സിൽ നിന്ന് നിങ്ങൾക്ക് എന്തൊക്കെ മനസ്സിലാക്കാൻ കഴിഞ്ഞു എന്നറിയാനുള്ള ഒരു ചെറിയ വിലയിരുത്തൽ മാത്രം. അതിനാൽ പേടിയും ആശങ്കയും മാറ്റിവെക്കുക.
പരീക്ഷാ ഹാളിലേക്ക് പോകുമ്പോൾ ശ്രദ്ധിക്കാൻ ചില കാര്യങ്ങൾ:
-
ആസൂത്രണം ചെയ്യുക: ഉള്ള സമയം വെച്ച് പഠിക്കാനുള്ള ഭാഗങ്ങൾ വിഭജിച്ച് പഠിക്കുക. ഉറക്കമൊഴിച്ച് പഠിച്ച് ആരോഗ്യം കളയരുത്.
-
ആത്മവിശ്വാസം കൈവിടരുത്: പഠിപ്പിച്ചു തന്നതൊക്കെയും കൃത്യമായി ഓർത്തെടുക്കാൻ നിങ്ങൾക്ക് കഴിയും. ഉഷാറായിട്ട് വേണം പരീക്ഷാ ഹാളിലേക്ക് പോകാൻ.
-
ചോദ്യപേപ്പറിനെ പേടിക്കരുത്: ചോദ്യപേപ്പർ കൈയ്യിൽ കിട്ടിയാൽ ഒരു ദീർഘശ്വാസം എടുക്കുക. കൂളായിട്ട് എല്ലാ ചോദ്യങ്ങളും ഒന്ന് വായിച്ചു നോക്കുക. അറിയാവുന്ന ഉത്തരങ്ങൾ ആദ്യം എഴുതി തുടങ്ങുക.
പരീക്ഷ കഴിഞ്ഞാൽ കാത്തിരിക്കുന്നത് ഓണാഘോഷം!:
പരീക്ഷയെക്കുറിച്ചുള്ള ടെൻഷൻ മാറ്റാൻ ഏറ്റവും നല്ല വഴി പരീക്ഷ കഴിഞ്ഞാൽ വരാൻ പോകുന്ന ദിവസങ്ങളെക്കുറിച്ച് ചിന്തിക്കുക എന്നതാണ്. അവസാനത്തെ പരീക്ഷയുടെ അവസാനത്തെ ബെല്ലും കേട്ട് സ്കൂൾ വിട്ടിറങ്ങുന്ന ആ നിമിഷം ഒന്നാലോചിച്ചു നോക്കൂ! പിന്നെ പത്തു ദിവസം പുസ്തകങ്ങളില്ല, ഹോംവർക്കുകളില്ല... വെറും ആഘോഷം മാത്രം!
മുറ്റത്ത് പൂക്കളമിടാനും, കൂട്ടുകാരൊത്ത് കളിക്കാനും, ഊഞ്ഞാലാടാനും, വിഭവസമൃദ്ധമായ ഓണസദ്യ കഴിക്കാനുമൊക്കെയായി മനോഹരമായ ഒരു ഓണക്കാലം നിങ്ങളെ കാത്തിരിപ്പുണ്ട്. ആ അവധിക്കാലം അതിന്റെ പൂർണ്ണതയിൽ അടിച്ചുപൊളിക്കണമെങ്കിൽ ഇപ്പോൾ ഈ പരീക്ഷകൾ വളരെ ഉഷാറായി തന്നെ എഴുതിത്തീർക്കണം.
പ്രിയപ്പെട്ട രക്ഷിതാക്കളുടെ ശ്രദ്ധയ്ക്ക്:
മക്കൾ പരീക്ഷ എഴുതാൻ പോകുമ്പോൾ ഏറ്റവും വലിയ പങ്ക് വഹിക്കേണ്ടത് നിങ്ങളാണ്. അവർക്ക് വേണ്ടത് ചെറിയൊരു 'ബാക്ക് സപ്പോർട്ട്' ആണ്.
-
സമ്മർദ്ദം ഒഴിവാക്കുക: പഠിക്കാൻ പ്രേരിപ്പിക്കാം, എന്നാൽ ഒരിക്കലും അവരെ അമിതമായി പേടിപ്പിക്കരുത്. റാങ്കുകൾക്കും മാർക്കുകൾക്കും അപ്പുറമാണ് നിങ്ങളുടെ കുട്ടിയുടെ മാനസികാരോഗ്യം എന്ന് തിരിച്ചറിയുക.
-
താരതമ്യം വേണ്ട: "അയൽപക്കത്തെ കുട്ടിയെ കണ്ടു പഠിക്ക്" എന്ന ഡയലോഗ് ഈ പരീക്ഷാക്കാലത്തെങ്കിലും ഒഴിവാക്കുക. ഓരോ കുട്ടിക്കും അവരുടേതായ കഴിവുകളും പരിമിതികളുമുണ്ട്.
-
അന്തരീക്ഷം ഒരുക്കുക: അവർക്ക് സ്വസ്ഥമായി ഇരുന്ന് പഠിക്കാനുള്ള ഒരു അന്തരീക്ഷം വീട്ടിൽ ഉണ്ടാക്കിക്കൊടുക്കുക. നല്ല ഭക്ഷണവും ആവശ്യത്തിന് ഉറക്കവും ഉറപ്പുവരുത്തുക.
-
പ്രോത്സാഹനം നൽകുക: പരീക്ഷ കഴിഞ്ഞു വരുന്ന കുട്ടിയുടെ മുഖം വാടിയിട്ടുണ്ടെങ്കിൽ, അവരെ ചേർത്തുപിടിച്ച് "സാരമില്ല, അടുത്തത് നമുക്ക് നന്നാക്കാം" എന്ന് പറയാൻ കഴിയണം. പരീക്ഷയൊക്കെ അവർക്കാവുന്ന രീതിയിൽ അവർ എഴുതട്ടെ.
സ്വാതന്ത്ര്യദിനത്തിന്റെ ആവേശവും, ഓണത്തിന്റെ പ്രതീക്ഷയും, പരീക്ഷയുടെ ചെറിയൊരു ഗൗരവവും എല്ലാം കൂടി ചേരുന്ന ഈ ഓഗസ്റ്റ്-സെപ്റ്റംബർ മാസങ്ങൾ നമ്മുടെ കുട്ടികൾക്ക് മികച്ച അനുഭവങ്ങളുടേതാകട്ടെ. എല്ലാ മക്കൾക്കും ഓണപ്പരീക്ഷയിൽ മികച്ച വിജയം കരസ്ഥമാക്കാൻ കഴിയട്ടെ എന്ന് ആശംസിക്കുന്നു! കൂളായിട്ട് പരീക്ഷയെഴുതൂ... എന്നിട്ട് ഓണം ഒന്നാന്തരം ആയിട്ട് അടിച്ചുപൊളിക്കൂ!
Article By: Mujeebulla K.M
CIGI Career Team